Sorkar sum hman leh insawifiahna

Wireless radio system lei chungchanga sorkar insawifiahna chu tenawm an tih thu Mizoram Pradesh Youth Congress Committee (MPYCC) chuan an sawi a. Covid-19 léng vanga sum renchem mek a nih laiin, Mizoram sorkarin hripui leng denchhena chhiah a tihpun hmanga mipui sum a rawk mai bakah, sum siam nan bungrua to uchuak taka a bika thlante hnena a supply tir nia sawiin, thil pawi leh lungchhiatthlak a nih thu an tarlang.

Tun hnaia sawi hlawh tak wireless radio system leina hi Mizoram mipuiin an ngaihven hle a, thil kal dan fel lo nia rinhlelhna a lian hle. Sorkar hian thil a lei danah man to uchuak taka lei chu a lo nei fo tawh ṭhin a, tun hi chu hri dona bungraw leina a nih bakah hri len laia thil thleng a nih vangin mipui thikthu a chhe zual a tih loh theih loh. 

Mizoram sorkar hian sum a neih loh thu a sawi ta zauh zauh a, inrenchemna tur pawh thui tak ruahmanna siam a, lirthei lei chungchang thlengin inren a tum ta niin a lang a, a lawmawm hle. State hausa zawk pawhin an hman loh lirthei man to tak mai kan minister-te leh sorkar mi pawimawhte'n an kawl fur a, lirthei hman theih pangngaia ṭha bik tak kan officer rual leh minister-te'n an kawl laia state-in pawisa a neih loh thu sawite hi thil inhmeh lo tak a ni ang. 

Covid-19 hri len tawh hnua department ṭhen­khata hna hman­hmawhthlak niawm taka an thawh dan te, chumi hnua sorkar insawifiah zui dante thleng khan ngaih a ṭha lo a, kan sorkar hi kum hnih pawh a nih hmain vawi tam a insawifiah ta mai hian fiah lo lai a awm ngei nia rinhlelhna a siam lo thei lo.