Lirthei chhiah leh Mizoram

Mizoramah lirthei chhiah pe lo an tam thu leh, driving license thi tawh a tam thu Transport Minister chuan tun hnai khan a sawi a, heng mite hian chawi belh loa chhiah an pek theihna turin sorkarin ruahmanna a siam dâwn.

Transport Minister sawi danin May 31, 2023 thleng khan Mizoramah lirthei 2,91,883 ziah luh a ni a, chu'ng zinga 89,225 chu chhiah pek tur ang pe kim lote an ni.

Kan rama chhiah pek dan leh lâkkhawm danah hian siam rem ngai tam tak a awm niin a lang a, a petute tana awlsamna zawn thiam a pawimawh hle. Online hmanga chhiah pek theih dan te, hun rei tak tak intlar ngai loa chhiah pek theih dante ngaihtuah chhuah zel ni se; hei aia pawimawh mah zawk nia lang chu chhiah pe lo zawn chhuah thuai theih dan hi a ni ang.

Kan ramah heti zat lirthei chhiah pe kim lo an awm a nih chuan sorkarin a sum hmuh tur ang hmuh loh a ngah hle tihna a ni a, sum neih loh avanga harsatna tawk mêk sorkarin mipui aṭanga a sum hmuh ngei tur a hmuh loh hi a uiawm tham hle a ni.

Sorkar hian lirthei chhiah a hmuh lêt theihna turin ruahmanna ṭha zawk zawng zel se, a state pum anga heti zat lirthei chhiah pe lo kan awm a nih chuan sorkarin a hloh hi a tam tham hle mai a, ruahmanna ṭha tak siam a ngai a ni.