Buhfai leh Mizoram

Food, Civil Supplies & Consumer Affairs (FCSCA) Minister chuan, kum 2019 - 2022 chhungin fûr laia tla tur buhfai an chhêkkhawl ṭhin avangin tun thlengin ei leh bâr tlâkchham vanga rilṭáma thi an la awm lo tih a sawi a; FCSCA hmalakna hrang hengte mipui hriatah a puang a ni.

Mizoram sorkarin rilṭama kan thih lohna tura ruahmanna a siam hi thil lawmawm tak a ni a, buhfai ei tur nei loh avanga thi hi kan awm hlauh a nih chuan sorkar tan a mualphothlak hle dâwn a ni. Sorkarin ei leh bâr lâkkhawm kawngah ṭan a la a, buhfai bakah eirawngbawlna gas supply pawh ṭha takin a kal thei a, a lawmawm takzet a ni.

A lehlam zawnga thlir chuan, kan ram dinhmun hi a lungchhiatthlak takzet a, state dang aṭanga buhfai lalut chak chu sorkar chak sawina angah kan hmang ta lek lek mai. A thawk chhuak tura inzirtir aiin a lalut turin kan inzirtir a ang a; an sorkar huna vai buh eitir min tum tawh lote pawhin tunah chuan an sawi ri leh tawh lo.

State dang aṭanga kan inlakkhawm chak chuan sorkar chak kan ni ta ber a, kan intodelhna turin hun rei tak chhung chu a pawisa sem zawnga kalin tun hi kan thleng a, mipui an lawm miau avangin thawh chhuah lam inzirtir loin a sem bawk kan la buaipui zel a, rilṭama thi em kan la awm lo a nih chuan kan lawm zel phawt dawn a nih hmel e!