Cyber crime leh Mizoram

Mizoram Police hnuaia Cyber Crime Police Station hotute chuan tun hnai khan thuthar thehdarhtute pualin internet kaltlanga pawikhawihna chungchang zirhona, 'Sensitization workshop on cyber crime' an buatsaih a, internet kal tlanga inbumna leh pawikhawihna awm hrang hrangte an zirho.

Mizoram pawhin khawvel hmun dangte rualin internet leh a kaihhnawih thilte kan lo hmang chho ve ta zel a, hemi kaihhnawih harsatna leh buaina hrang hrang pawh kan tawk chho zel. Thil tam tak hi chu hriat lohna vanga thleng a ni a, thil ṭhenkhat erawh hre reng chunga kan tihluih thilte a ni ve bawk.

Cyber crime kan tih hian a huam zau hle mai a, chu'ng zinga kan buaina langsar deuh deuhte chu sum kaihhnawiha inbumna hi a ni. Hlawk thut duh leh vawi leh khata sum hmuh duhna avangin mi tam tak chu bumin an awm tawh a, mi fing anga ngaih leh lehkhathiam zingah ngei pawh bum tawk an awm zel hi a pawi hle a ni.

Ṭhalai zingah chauh thleng tura ngaih, zahmawh leh chumi lam hawia hming hliau theihnaah puitling zawkte thlengin an tal buai ta zel a, internet khawvel hi zuam sual awl tak a nih vangin mipui kan fimkhur tlan a ṭha hle.

Cyber crime leh a kaihhnawih thilte hi tun aia zau zawkin inzirtir ni se, zirtirna dawng loa internet hmelhriat kan tam avang hian zirtirna ṭha zawk hi kan neih zel a pawimawh takzet a ni.