Frontline worker leh election official

Mizoramah tun hnaiah frontline worker zingah Covid-19 positive hmuh chhuah an ni zel a, hei bakah hian tun hnaia Village Council leh Local Council inthlanaa duty election official eng emaw zat leh he inthlan kaihhnawiha mi ṭhenkhatin Covid-19 an vei tih hmuh 

a ni bawk.

Sorkar hian frontline worker zingah police leh medical worker lam hi chu an inenkawlna senso tumsak a nih tur thu a lo sawi tawh a, tlawmngaia hlawh nei loa inpe task force member-te erawh inenkawlna senso tumsak turah an ziak tel lo. Tun hnaiah task force mi leh sa hripui kai enkawl mekte an au chhuahpui hnuah, VC inthlan hma zanin notification pawh awm lem loin sorkarin DIPR thuchhuah hmangin task force-te inenkawlna senso an tumsak tur thu hi an chhuah leh chûk chûk a, hei hi sorkar notification-in a zui tura ngaih a ni.

Frontline worker kan tih maite chu Covid-19 an kai palh a nih pawhin inenkawlna senso chu sorkarin a tumsak dawn niin a lang ta a, hetihlai hian sorkar tirh anga election official-te leh leh inthlan kaihnawiha hripui kaite inenkawlna senso hi sorkar hian a tumsak ve dawn em?

Chiang taka finfiahna la awm lo mah se VC leh LC inthlana duty zingah Covid-19 positive hmuh chhuah an awm nual a, anni hi sorkar hnathawkte an nih hlawm avangin sorkar hian a tirah an inenkawlna senso a tumsak lo a nih pawhin medical re-embursement an la bill leh thei ang. Hetihlai hian political party mi leh sa, inthlannaa duty leh vote chhiarnaa duty zingah pawh hripui kai hi an awm a, heng mite leh anmahni aṭanga kai chhawng leh theite dinhmun hi sorkar hian a ngaihtuah a ngai takzet a ni.

Hripui lenlai leh political party zawng zawng deuhthawin inthlanna kalpui lo tura an ngen chungin inthlan luih a ni a, Mizoram sorkar leh State Election Commission hian inthlanna kaihhnawiha hripui veite inenkawlna senso hi a bâ a, an inenkawlna hi tumsak ngei rawh se.