Ram ni pawimawh

Vawiin, August 15, 2023 hi India Independence Day vawi 77-na a ni a, India ram pumah lawm a ni ang. August 15, 1947 khan India chuan British awpna hnuai aṭangin zalenna a hmu a, mahnia ro inrelin a awm ta a ni.

India rama cheng Mizote hian tun hma deuh kha chuan India khua leh tui nih hi kan hreh hle ṭhin a, 'Indian' han nih tawp mai hi kan nihnaah an pawm hreh ṭhin hle. Hun a lo kal zel a, tunah chuan Indian kan nih hi kan pawm tlâng ta hle a, a helh deuh leh Indian ni loa inchhal ṭhenkhat awm bawk mah se, India khua leh tui kan nih hi chu kan pawm ta a ni.

India rama ni pawimawh ber chu August 15 hi a ni a, he zalenna thlen ni hi ram pumah lawm a ni ṭhin. Tlem lai deuh aṭang khan he ni lawmna lian ber Aizawl Lammuala neihah hian kal tura beisei sorkar mi liante an kal ṭha lo ṭhin hle mai a, a pawi hle a ni.

Ram ni pawimawh hi uar taka lawm ni se, sorkar hnathawkte mai ni loin mipui nawlpui hian hlut thiam ila, India zalenna ni hi hlim leh lawm takin i hmang ang u.