Ramri sawiho a hnai em ni?

Assam Home department-a Additional Secretary chuan tun hnai khan Mizoram Home department hotute telephone hmangin a bia a, ramri chungchanga inbiak hnaih ṭha an tih thu leh, Assam Border Area Protection and Development minister Atul Bora remchan hun an nghah mek thu an rawn hrilh.

Heti a nih chuan ramri chungchangah Mizoram sorkar leh Assam sorkar aiawhte an inbe leh hnai mai niin a ngaih theih a, hei hi thil nghahhlelhawm tak a ni.

Ramri buaina avangin inkahna hial a thleng tawh a, ram leh ram pawh ni loa state leh state inkara ramri inchuh avanga inkahna hi a thleng zen zen lo. Inkah a nih hnuah kan ramri erawh a tawn tawnin kan la sawn lem lo niin a lang a, chutihlaiin Assam lamin an duh thala min nek ṭhin leh silai kenga kan rama min luhchilh ṭhin erawh an tím ta niin a lang.

Assam lam inpeih leh inrin hun nghak lo hian kan ram lam aṭang pawh hian state ramri chingfel tura nawr dan hi awm thei se duhthusam a ni a, Mizoramin ramri chungchanga kan ngaihdan kan thehluh tawh pawh tun thlenga min la chhang lo hi a fel lo hle a ni.

Ramri buai hi chinfel dan hrang hrang a awm a, dawhkan kìla inbiaa ramri chinfel tum hi a finthlak a; Assam lam inpeih leh an remchan hun nghak kher lo hian, Mizoram lam hian hmanhmawh thei deuh tura Assam lam zuk dawr pawh hi a ṭha hle awm e.