Hachhek bial harsatna hi

Hachhek Bial Kuhva Chingtu Pawl (HBKCP) hmalaknaa July 12, 2023 aṭanga Zamuang Police check post-a kuhva chíngtute an duty ṭhin chu an la chhunzawm zel a, englai pawha duty turin an inchhâwk ṭhin. HBKCP hruaitute chuan, kuhva tawlhrûk kal tur vengtu an indah avangin kuhva hralhah harsatna an tâwk tawh lo tih an sawi.

Hun rei tak chhung chu HBKCP hian an area chhungah dan loa kuhva tawlhruk hi an veng ṭhin a, an remchanna hmuna an duty ṭhin hnuah tun hnaiah police check point-ah an insawn a, police-te an tichak a ni ber mai. Police check post-a khawtlang ṭangrual an duty ta hian kan ram dinhmun leh he sorkar dinhmun hi chiang takin a tarlang a ni.

Zèp thu a cheng lo a, hun rei tak chhung chu kan ramah ngei mai kuhva smuggling hi chhun ènah pawh an kalpui ngam a, police check gate hrang hrang awlsam takin an paltlang thei. Assembly House-ah sawi chhuah a nih pawhin thuneitu lam zawkin an chháng pial zel a, kuhva chíngtute eizawnna a nghawng thu hi an ngaimawh lem lo.

Tunah chuan inthlan a lo hnai chho ta a, Mamit leh Kolasib district lama kuhva chingtute harsatna sawi chhuah ṭhin pawhin ngaihven a hlawh chho zel a, nimahsela sorkar hmalakna erawh a la beitham hle. Police check post-a police-te hmuh hmaih fo; kuhva smuggling veng tura duty a la ngai hi sorkar hian mualphonaah a ngai ang em?