Mau hman dan tur kan la rél laih laih

National Bamboo Missions (NBM)-in Asian Development Bank nena ṭang duna hmarchhak State pangaa mau behchhan industry-te tihchangtlun leh thawhhotir tumna, Bamboo Value Chain Development-in North East chu Chief Minister hoin Mizorama kalpui dan tur tun hnai khan an sawiho a; Mizoramin a ṭangkai thei ang bera a hman theih nan leh mipuite'n hlawk taka an chhawr theih nan; tuna mau hmanga industry kalpui mêktute nen inràwnkhawmna neih phawt ni se, an ti.

Mau/rua hi Mizoram sorkar flagship policy a ni a, Chief Minister pawhin a atchilhin theihtawp chhuahin mau hmanga intodelh theihna turin ṭan a la. Chief Minister hian mau/rua hmangin Mizoram economy chawi kan a tum thute ngaihnawm takin a sawi a, a sawi uar chang phei chuan IAS pawhin hna an bansan theihna hial tur a nih thute a sawi.

Mau leh rua kan kalpui dan leh kan thlen chin en hi chuan kan sum sen nen hian lungawi a harsa hle mai a, kan sum sen tam tawhzia leh tun thlenga a hlawkna kan la tel lo mai pawh ni lo a, a kalpui dan tur kan la sawiho chauh mai hi chu ka ṭuan a muang deuh a ni.

Mau chung-changah hian thusawi ngaihnawm tak tak kan ngaithla ngun tawh a, sum pawh ṭhahnem tak kan dawng tawh a, state sorkar sum pawh kan seng ral hnem tawh hle. Tuna mau lah ruaa kan thlen chin ngaihtuah hi chuan, Mizoram economy chawi kanna atan chuan kan la hmang lawk dâwn lo niin a lang.