Mipui sum CMRF hmanna âwm leh âwm lo
MPCC chuan Chief Minister's Relief Fund (CMRF) aṭangin a thlàwna swab sample test kalpui an phût tih an puang a, "CMRF for Covid-19-ah, Covid-19 vanga harsatna tâwkte ṭanpui nan cheng vbc. 20.90 zet chhûn luh a ni tawh," tiin a mamawhte a thlawna test tihsak an duh thu an sawi. Hetihlai hian CMRF zinga nuai 600 chuang chu sorkar sum zawk hmanna àwm takah hman a nih thu a sawi.
Mizo mipuite'n sorkarin hripui a dona atan pawisa ṭhahnem tak CMRF-ah an chhung khawm a, Mizo ṭhalai zinga thiamna bik nei ṭhahnem tak hlawh nei loa hri dona atana thawk turin an inpe a, khawtlang mipuite 'Task Force' tih hming invuahin mahni inthâpin a thlawnin hna an thawk a, he hripui dona atan hian mipuiin an thawh hlawk hle a ni.
Hetihlai hian hripui kai mek quarantine centre-a awmte RT-PCR test tih nan Rs. 2,500 leh TrueNat hmanga test atan Rs. 1,500 sorkarin a chawitir a nih chuan a fel lo hle a ni. Mi tumahin mahni duhthuin he hri hi an vei lo a, hri dona atan mipui pawisa thawh khawmin a la daih em em laia a vanduai bikte insengso tur zawnga sorkarin ruahmanna a siam a nih chuan thil fuh lo tak a ni.
Hei bakah hian 'relief fund' hmanna âwm lo tak khawl leina atan leh thil dang atan sorkar hian sum a seng nual a, hei pawh hi ennawn a ṭha khawp mai. Sorkar damdawi-ina hman tur khawl leina atan mipui thawh khawm sum hman hi a inhmeh lo a, mipui thawhkhawm sum hmang hian hri vei mekte hi enkawl ni zawk se, sorkar hian a damdawi-in mamawh khawl leina tur hi chu a pawisa neih sain lei rawh se.
Mizoram sorkar hian a pawisa neih sa sênna tur ni awm takah mipui sum thawh khawm CMRF aṭangin sum a theh chhuak a: Micro PCR Machine - Rs. 3,19,83,830; RAT kit - Rs. 1,40,29,000; Directorate of Hospital & Medical Education, Aizawl leh Kolasib DC-te hman atan - Rs. 1,40,42,000 a theh chhuak a; sorkar sum hmanna âwm takah cheng nuai 600 vel zet mipui sum thawhkhawm zawk a hmang hlauh a, mipui zinga hripui veite chuan anmahni inenkawlna sum an chawi a ngai leh ta lawi si a ni.
Sorkar hian a duhna zawnah chuan sum hi a nei lo hauh lo a, tunah hian mamawhna anga hman ṭhen theih SEDP hnuaiah ringawt pawh cheng nuai sang tam a la awm a, tuna a kal danah hi chuan hri vei mekte vanduaina belchhah turin inenkawlna senso a tumtir a ni ber a, a zialo ngawt mai.