Thil thawn chhuah hlawk zawk

Tun hnai khan Mission Organic Mizoram (MoM) Mission Director chuan Tuichángral Organic Farmer Producer Co. Ltd te tharchhuah Lakhuihthei quintal 6 chu Mumbai-a Josie’s Kitchen, North East Cuisines pan turin a vai liam a; Agriculture Minister Pu C.Lalrinsanga chuan lakhuihthei quintal 5 a lo vai liam tawh bawk.

Mizorama kan thlai leh thei thar chhuahte thawn chhuahna tur kan neih loh chuan kan thawh nasat poh leh kan harsatna a lian mai dawn a ni a, mipui kan tlem avangin tualchhunga kan ei zawh theih ringawt hi chu hlawk tham a tling tak tak lo. Tun hnaiah kan thei thar chhuahte state pawna kan thawn chhuak ve ṭan ta hi a lawmawm hle a ni.

Hetihlai hian a hlawk thama kan thawn chhuah loh chuan awmzia a nei thui lo palh ang tih a hlauhawm a, thil tlem tham lutuka thawn chhuah hi chuan a thawn manah kan inseng a, hlawk thama thawn chhuah a harsa ṭhin.

A thawn chhuah hlat lam aia pawimawh chu a thawn chhuah tam lam a ni a, thil tlem tham té téa thawn chhuah hi a hminga thawn chhuah ni ve bawk mah se, kuthnathawktute tana innghahna tham a ni ṭhin lo.

Kan thawn chhuah turte pawh kan zir chian hmasak a ngai a, kan ṭhenawm lawk aṭangin a hlawm lian zawkin an thawn chhuak reng em? tihte pawh kan chian a ṭha a; ṭhenawm state-in kum tam tak an lo thawn chhuah tawh thlai leh theiah hian tlem thama thawn chhuah hmanga inkhai chhuah hi a awl lo mai thei a, chhut chian ngam a ṭha.

Sorkar hian ngun takin a market lam hi zir chiang ṭhin se, kuthnathawktute tana innghah ngamna tak tak a tling nge tling lo tih hi ngaihtuah fo a ngai a; tun hnaia lakhuihthei thawn chhuah a ni hi thil lawmawm tak chu a ni e.