Kawngpui pawimawh vil uluk

Mizoram châk lakna ber national highway kawngpui chu Bualpui dâi velah chhiat lai ber a ni mek tih a hmuna tlawhtu MJA, Kolasib member-te chuan an sawi a; hei vang hian kawng thawm ṭhat thuai a nih theih nan hma la turin Kolasib Bawrhsap an ngen.

Mizoram hi tlâng ram a nih bakah ruah tui tlak tamna ram a ni a, kan ram lung a lo chang ṭha tawk lo bawk nen kan kawngpui hi a tlo lo hle. Kawngpui tlo loh chhan nia lang pakhat chu a pawisa lo kal hi 100% hi hman a ni lo nia puh theih turin hmun thenkhatah chuan an hmanraw hmante hi a ṭha tawk lo bawk.

Kawngpui zawng zawng vil sen a ni lo a, kan sorkar pawisa pawhin a daih lo thei bawk a, chutihlaiin kawngpui pawimawh hi chu tun aia uluk zawka enkawl leh vil hi a ngai hle a ni. State sorkarin a enkawl bikte leh National Highways & Infrastructure Development Corporation Limited (NHIDCL)-in an enkawlte a awm hrang a, a enkawltu chu tu pawh ni se kan kawng pawimawh bik hi chu tun aia uluka vil a ṭul takzet a ni.

Fur a lo thleng dâwn a, ruah tui a tam dâwn a, kan kawngpui a tlo lo ṭhin tih hre reng chunga lirthei kal hleihtheih loha kawngpui pawimawh a awm fo hi a zialo deuh chu a ni.