Hnahlan grape leh a chhehvel

Hnahlan Grape Farming & Processing Coop Society (HGFPCS) Ltd leh A North East Wave (NEW) Initiative-te ṭangkawp chuan tun hnai khan Hnahlan Winery-ah Grape Festival 'The Grape Escape' an buatsaih. Hnahlan Winery-ah hian fermentation tank 22 (11,000 litre theuh) a awm a, grape quintal 200 lenna cold storage an nei bawk.

Mizorama kuthnathawktute tana project siam tawh zinga hlawhtling ber pawl chu Hnahlana grape chin hi a ni awm e. Hnahlanah hian kum 2007 khan winery bul ṭan a ni a, Hnahlan leh a chhehvel khuaahte hian Bangalore blue grape variety chingin bul ṭan a ni a, MNF-in sorkarna vawnfung an chelh laia bul ṭan niin Congress hunlai pawhin chhunzawm zel a ni.

Sorkarna a inthlak chho zel a, MNF-in sorkarna vawn fung an chelh leh hnuah zu khap burna dan an kalpui avangin Hnahlan grape aṭanga siam chuah wine-te pawh chu khap a ni ta a, dan tlawh chhan mumal awm si loin Millennium Centre leh a chhehvela wine zawrhte chu an mankhawm chiam a ni.

Hnahlan wine an man hi mipuiin nasa takin an sawisel a, social media lamahte sawiselna a nasat hnuah a hma lawka wine mantute chuan zawrh an phal leh hnuhnawh a, tunah phei chuan grape festival hial huaihawt a ni leh ta hi thil lawmawm tak a ni e.