Aizawl lockdown leh eizawnna

Tun hnaiah Aizawl khawpui­ah Covid-19 vei thar an pun nasat avangin invenna turin sorkar chuan lockdown a puang a, September 11-17 chhung chu Aizawlah phalna nei lo chu pawn chhuah khap tlat a ni. 

India rama Covid-19 avanga inkharkhip rei/ ngun ber tawh khawpui thlang dawn ila, Aizawl khawpui aia inkharkhip rei zawk hi sawi tur an tam kher lo ang. Mipui himna turin sorkar hotute'n ruahmanna an siam a, khawtlang hruaitute'n theih­tawp chhuahin an ṭawiawm a, mipuiin an zawm ṭha bawk a, khawpui dangte nena khaikhin ralah chuan hripui vei pawh an la tlem hle a ni. 

Hetihlai hian kar khat lek lek inkhar­khip avanga kan hripui leng hi tihrem emaw, tih­ziaawm deuh emaw theih niin a lang tawh lo a; hnathawktute'n chak taka hna an thawh theihna tur leh hnu chhui hna an thawhna tura lockdown a ṭangkai rual hian, he hripui avanga chhuanchham lek lek leh harsatna tawk chhungkua an tam tawh hle a ni. 

Thingtlangah chuan mirethei ber pawhin a pualin lo a nei thei a, mi taima pangngai chuan ei khawp na na na chu a thar chhuak mai a; khawpuiah erawh chuan miretheite hian hnathawhna hun an neih tlem poh leh an retheihna belhchhahin a awm tihna a ni. Tuna hripui lengin a nghawng nat ber hi teh theih ni lo mah se, khawpuia miretheite (urban poor) hi a tuar na ber pawl an ni ngei ang. 

Hripui lakah inven a ṭul a, chutih rual chiah chuan kan dam khawchhuahna tur ngaihtuah tel a ngai bawk a, hetah tak hian sorkar hotute tan pawh kal dan tur hriatthiam a harsa hle ang. Ram leh khawpui pumpui tana ṭha an ngaihtuah rualin, nitina thawh chhuah chawp eia inhlawhfate harsatna an en kân a thiang lo a, sorkar hnathawk hlawh kiam ve miah lote'n lockdown a ṭhat thu an sawi rual apiang hian mi­retheite manganna belhchhah a ni tih an hriat tel a ṭha hle.

Lockdown ṭhatna tam tak a awm rual hian, a khawpui pum­puia inkharkhip bur bur lo deuha kalte pawh a hun tawh mai thei a; hripui len nasatna hmun leh hmun him deuhte thliar a, ngaihtuahna kan sen ngam pawh a hun tawh mai thei a; thutlukna siamtu sorkar thuneitute tan finna dilpui a ṭul takzet a ni.