Nuai 17,811 ṭul loah hman a ni em?

Mizoram Pradesh Congress Committee Vigilance Cell Chuan Meidum leh Hortoki inkar kawng laihnaah ṭul loa mipui sum nuai 17,811 hman a ni-ah an ngai a, chhui chiang turin Lokayukta-ah ziakin ngenna an thlen.

MPCC Vigilance Cell hruaitute chuan, Hortoki khaw chhehvelah ONGC-in lei chhungril an zir chiang a, chumi atan chuan khawl leh lirthei lian tak tak lakluh a ngaih avangin Meidum-Hortoki kawng chu laih a nih thu RTI Act hmanga zawhna chhannaah tarlan a ni tih an sawi a; nimahsela ONGC lam hian oil/gas zawn hna hi chawlhsanin October 7, 2015 khan he hmun hi an chhuahsan daih tawh a, chuti chung chuan MNF sorkar hnuah restricted tender hmangin cheng nuai 17,811 man hna hi an thawk ta zel a ni.

He kawngpui ni lo kawngpui dang mamawhna a san tehlul nen, mipui sum tam tak senga he hna an kalpui tlut tlut mai hi a mak khawp mai. Hnathawktu an thlan chhuahte pawh open tender ni loin mi zawng zawng chhan ve theih lohin restricted tender bawk hman a ni a, Chief Minister laina hnai tak an awm leh bakah Lengpui Airport sâ chimtu LR Construction pawh an lang leh bawk.

He kawngpui siam dan leh a pawisa kal vel dana inpuh tawnna awm hi sorkar hian a chhan ngei a ngai a, sorkar hnathawkin a huna hlawh an lâk theih loh lai a, mipui pawisa hetianga hman a nih ngai chuan a zia lo hle a ni.