Restricted tender atchilh sorkar?

Sports & Youth Services Minister chuan Assembly Session-ah zawhna ziaka chhángin, kum 2019 aṭangin SYS department-in open tender hmangin hna an pek loh thu a tarlang. Kum 2019 aṭangin Sports department-in restricted tender hmangin hna 52 an pe chhuak tawh a; restricted tender hmanga hna pek tam ber chu M/s Decor India, GS Road, Guwahati niin, hna 16 pek a ni.

Restricted tender hi hna hmanhmawhthlak bikah te, thiamna bik ngaiahte leh thil ṭul bikahte hman ṭhin a ni a, thil ṭha tak a nih rualin duhsak zawngte tana remchang siamna a ni tel thei. Mizoram sorkar hian hun rei deuh tawh aṭang khan restricted tender hmang hian hna lian tham zawng zawng deuhthaw hi hna a pe ta a, Congress-in sorkarna vawn fung an chelh hunlai aṭangin kalpui tawh kha niin; a hnathawktu tur hi an hre lawk tiin a sawi theih ang.

A hmutu tur hresa vekin tender an chhuah a, an hmelhriatsa zelin hna an thawh avangin hna ṭha taka thawk pawh ni se mi ṭhenkhat tan chuan rinhlelh a kai lo thei lo a, a kalphung ber hi a fel lo lai chu a ni. Hna pahnih khat mai pawh ni lo, kum 2019 hnua hna awm zawng zawnga department pakhatin restricted tender an hmang a nih chuan, MNF-in sorkarna vawn fung an chelh hnuah chuan open tender-in hna an la thawk miah lo tihna a ni a, kalphung him lo tak a nih theih bakah tute emaw tan induhsakna lantir theihna remchang a ni thei.

Sorkar hnuaia hna kan tihte hi mipui sum aṭanga thawh a nih avang hian mipui hian a hna kalphung, a thawktu tur thlan dan leh a sum chet vel dan pawh kan hriat a ṭha a, kan sorkarin department hrang hranga hna lian tham thawktu a thlan apianga 'restricted tender' a hmang zel mai hi eng tia ngaih tur chi nge ni ang le?