Covid-19 vei enkawlna hmunhma

Tun hnaiah Mizoramah Covid-19 positive an pung zel a, Mizoram sorkarin Covid-19 hri veiho enkawlna tura a siamte chu a khat ṭan tawh a, tunah hian sorkarin Covid Care Centre (CCC) tur a ngaihtuah belh mek a. Kohhran leh YMA branch ṭhenkhatin an hmunhmate hmantir an phal thu an sawi.

Tun ṭum hripui lenga Mizorama thil hmuhnawm ber leh ngaihnawm ber pakhat chu kohhran leh tlawmngai pawlte che vel leh an inpekna hi a ni a, sorkar ṭawiawm turin tha an thawh mai ni loin mahni insengsoin an pen chhuak a ni. Phai aṭanga Mizo tangkhangte a hlawma an lo kir khan sorkar hmun­hmain a daih lo a, veng tin leh khaw tina kohhran hrang hrangten an hmunhma a thlawnin an hmantir a. Kohhran ṭhenkhat phei chuan ei leh in thlengin a thlawnin an tumsak a ni.

Tunah chuan kan duh loh danin he hripui hian min luhchilh chho ta a, Covid-19 hi a ni telin an pung zel a, mithiamte chhut dan chuan kan la pun belh zel dawn niin a lang. Hei vang hian CCC kan neih sate hian a tlin dawn lo niin a ngaih theih a, sorkarin CCC-a hman theih awmte nasa takin a dap a, hetihlai hian kohhran leh YMA-te an rawn lang leh ṭan a, a lawmawm takzet a ni. 

Kohhran ṭhenkhat hi chuan hmunhma an nei changtlung em em a, Covid-19 vei natna lang chhuak lote enkawlna atan chuan sorkar hmunhmate aiin a ṭha hial ang. Zoram Medical College leh sorkar damdawi-inte hi natna lang chhuak leh enkawl ngaite dahna atan tihâwl theih ni se, natna nei lem lote hi chu kohhran leh YMA inphal deuhte hmunhmaah hian dah theih ni se a lawmawm ngawt ang. Hetihlai hian sorkar sikul leh college building ṭhenkhatte pawh hi CCC-a hman theih tur hmun fâl leh him ṭha a awm thei nual awm e.

YMA branch ṭhenkhat leh kohhran ṭhenkhat inphalna a lo lang chhuak mek a, he thawhhona ṭha tak zarah CCC hmunhma ṭha leh changtlung tak kan neih belh thei dawn niin a lang.