Chhiat tawhna leh kan ṭawngkam

Tun hnaiah Sairang bula Kurung lui chunga rel kawng siam meka lei dawh mek chu a chim a, mi 20 chuang an thi. He chhiat tawhna hian India ram a nghawng a, sorkar laipui leh Mizoram sorkara mi pawimawh tak takten he chhiat tawhna hi pawi an tih thu an chhuah.

Chhiat tawhna thleng hi a pawi takzet a, hetiang vanduaina vawrtawp a thlen laia kan ṭawngkam hman ṭhin kan fimkhur hi a ṭul hle a ni. He rel kawng siam hna hi Mizoram sorkar hna a ni lo a, hnathawktute pawh Mizoram sorkar thlan an ni hek lo a, he chhiat tawhnaa thawktute pawh hi Mizoram mi leh sa an ni hlawm lo.

Hetih lai hian hriat lohna vang te, politics ruihchilhna avangte leh chhan dang avangin Mizoram sorkar demna thute hmun ṭhenkhatah hmuh tur a awm a, a pawi khawp mai. Social media lamah chuan vanduaite tawrhpuina kan hmuh rualin àn hlá chhe tak takte hmuh tur a awm a, hetiang hi tun hma khan kan pi leh puite chuan an hmang lo ang tih a chiang a, ṭhangtharte'n a hun leh hmun hre loa thil kan sawi ta mai mai hi a zia lo hle a ni.

Eng thilah pawh chhiat tawk an awmin Mizo leh Kristian sawi àwma mawi leh ṭha chin hi sawi mai ila, politics-a inbeihna remchangah chhuah tum lo ila, chutiang bawkin politics-a hlawkpui pawh tum chi a ni lo ang. Tun mai ni lo vanduaina dang pawh thleng leh palh thei a ni a, vanduaina a thlen tawh hnu ṭawngkam hriam tak taka inbeih zui hi kan sim a ngai.

Tun hnaia social media kan hman nasat hnu hian Mizo tiha mawi lo, Kristian sawia awm lo thil hi a ri chhuak ta zauh zauh a, hei hi a pawi takzet a ni.