Mau hman ṭangkai

National Bamboo Missions (NBM) leh Asian Development Bank (ADB) ṭang dun kalpui tur, Bamboo Value Chain Development-in Northeast (BVCDNE), Mizorama kalpui dan tur inràwnkhawmnaa thusawitu Chief Minister chuan, tun hma deuh aṭangin Mizorama mau behchhan industry-te'n furniture lam an hawi deuh vek tih sawiin, "Kan mau neihsate hi a têt deuh avangin chutiang atan chuan a hman tlak vek chiah si lo a, harsatna an tâwk ta a ni," a ti a; industry-te'n an hman theih tur mau lian leh chhah chi chìn pun lamah Mizoram sorkarin hma a la mek zel tih a sawi.

Mau hmanga industry din hi kan Chief Minister hian a tuipui hle mai a, hei hi Mizoram economy chawi kan theihna tur a nih thu pawh a lo sawi tawh ṭhin. Hetihlai hian kan mau neihsate chu hetiang atan hian hmantlak a lo ni hlawm lo a, mau/rua lian leh chhah chi chìn pun lamah hma an la leh ta mêk a ni.

Chief Minister hian mau leh rua hmanga state chawi kan a tum dan hi kan state-a mau leh raw awmte hmang ṭangkai zawng ni loin; a hman tur hi kan la ching chawp niin a lang a, nghah peih a ngai deuh dâwn a nih hmel.

Kan rama awmsâ hman theih dan hi dap ni ta se a hlawk thei thoin a rinawm a, pawn lam aṭanga lakluh bawka bul kan ṭan dâwn a nih chuan mau leh ruaa kan sum sên zat seng hian thil dang pawh buaipui ila, a hlawk zawk mai thei?

Kan ramah mau leh rua ṭhahnem tak a awm a, a awmsâ hman ṭangkaina lam aia state pawna mi lakluh, phun nuna puitlin hun nghah zet a, industry atana hman tum hi chu a kawng a kualin a thui deuh a; mau leh ruaa kan pawisa sen tam ngaihtuah hian a let leh tur hi a tlem si ang tih hlauhawm tak a ni.