Mipui rin zawh loh health care?

Mizoram State Health Care Scheme (MSHCS)-ah inziak lut an tlem tial tial a, kum 2023-24 atan inziak lut mi (chhungkua) 26,569 an awm a, kum 2022-23 atana inziak lut 39,505 aiin 12,936-in an tlem zawk a, kum hmasa aia kumina a tlem zawkna hi 32.75% a ni.

Mizoram sorkarin a khua leh tuite an damloha inenkawlna atan MSHCS hi a duang a, thil ṭha tak ni mah se sum leh pai indaih lohna avangin an kalpui hleithei lo. MSHCS hi mipuiin ring tàwkin an inziak lut a, nimahsela an beisei ang a ni lo a, damlo bill ba a tam em em mai a, mipuiin an tuar mêk.

Sorkar pawhin ṭan a la a, Asian Development Bank-te dawrin health care atan sum a pûk dawn a, ruahmanna hrang hrang a nei chungin mipuiin an ring zo tawh meuh lo niin a lang. Kum khat chhung leka inziak lut tlakhniamna hi 32.75% zet a ni a, hei hi eng thilah pawh tlak hniamna lam a nih chuan a tam tham hle a ni.

Engpawhnise, Mizoram sorkar hian MSHCS hi a kalpui a nih rau rau chuan tun aia mumal zawka kalpui hi a ṭul a, a inziak lut an kian dan en hian mipuiin sorkar health care system kalpui dan hi an ring zo ta lo a ang hle.