Sorkar laipui leh state sorkar inkar

Sorkar laipuia Minority Affairs Minister of State chu tun hnai khan Mizoramah a rawn zin a, Mizoram sorkarin Prime Minister scheme hrang hrangte mipui a hriat chiantir duh loh bakah, hma a la ṭha duh lo niin a sawi a; mi rethei zawkte hamṭhatna tur sorkar laipui scheme-te ṭha taka kalpui thei tur state sorkar Mizorama a awm a ṭul thu a sawi bawk.

Sorkar laipui hi kan innghahna a ni a, khu lamah tu pawh sorkar se state sorkar tan chuan biak ṭhat a ṭul a, an tel loin kan la khawsa thei lo. Hei vang tak hian state sorkar leh sorkar laipui inkar hi boruak ṭha taka kalpui a ngai a, kan inzir chhoh zel a pawimawh hle ang.

Chuti ni loa a mamawhtu zawkin eng vangin emaw sorkar laipui ruahmanna awmte a tihlawhtling lo a, mi retheiten an dawn tur ang an dawng lo a nih chuan a pawi hle ang. Hei bakah hian hriat lohna avangte, hnathawktute taimak tawk loh leh bengvar loh avangin tih tur tih loh a awm thei bawk a, hengte hi kan inven thiam a ṭha hle.

Hetih lai hian sorkar laipui lama awm political party-te zawmpui nei loa state sorkar a kal hleithei lo anga zirtirna erawh a dik lo a, India kalphungah hian mahni party lamṭang an nih loh avang ngawtin sorkar laipuiin state sorkar a thlauh thla ngai lo.

Tun hnaia Union Minister of State thusawi hi thil dik a nih ngai chuan Mizoram sorkar hian a ti dik hauh lo tihna a ni a, sorkar laipuiin mi retheite tana ruahmanna a neih hrang hrangte hi a taka kalpui tur chuan state sorkar lam a chèt chak a ngai a, phur tak leh taima taka a bawhzui a ngai ṭhin.