Sports-a Mizoram dinhmun

National Sports Day 2023-a thusawitu Sports & Youth Services Minister chuan, "Covid hripui vanga India ram chhung state dang zawng zawng aiin Mizoram a inkhàrkhip rei bik a, chuti chung chuan tun hnaia Mizo infiammite'n international medal 166, national medal 388 leh regional medal 296, a vaiin medal 850 lai an hlawh chhuak hi a ropui hle," a ti.

Mizoram sorkar hian sports hi a buaipui hle mai a, Sports Policy a siam tawh bakah sum leh pai ṭhahnem tak sports chawi kanna atan a hmang. Sum leh pai hman dan aṭanga chhût chuan he sorkar hi Mizorama sports atana insengso nasa ber a nih hmel a, infiamna hmunhma ṭha leh changtlung tak tak a din bawk.

Hetihlai hian kan state hi sports-ah hian kan la hniam hle tih phat rual a ni lo a, Sports Minister hian medal kan lak hrang hrangte tarlang duah mah se, inelna leh tehna sang bera hman National Games 2022-ah chuan 28-na kan ni a, a hniam ber pawl kan ni. Hei mai hi a ni lo, North East Olympic Games, 2022-ah Mizoram chu India hmarchhakah pawh a hniam ber pawl niin parukna a ni.

Kan state hian sports-ah sum a seng a nih pawhin khawi laiah nge a sen a, eng atan nge a sen ral tih hi chhût chian a ngai. National Games-ah 28-na kan niha kan gold medal latu awm chhun lah chu state pawna inzir sipai a ni a, kan state chhung aṭang hian ram puma lang tham hi kan chher chhuah theihna turin ṭan lâk a ngai hle a ni.

State hmasawnna hrang hrang atana hman theih PMJVK pawh sports atan deuh vek kan hmang chungin, kan ram dinhmun hi a la sang lo hle tih a lang a, sports-a hmasawn tak tak tur chuan a hmunhma buatsaihna atan chauha sum dah hi a tawk lo a, infiamna tak takah sum tam zawk sen ngam a ṭul hle niin a lang.