Hri veite in lama enkawl

Health minister hoin tun hnai khan Covid-19 vei, harsatna nei lo (symptom nei lo)-te in lama inenkawltir chungchang an rêl a, 'Covid-19 positive, asymptomatic-te chungchangah an din­hmunin a tlin a, khawtlang hruaitute pawhin rem an ti a nih chuan, in lama inenkawl (home isolation) kalpui hi a ṭha zawk em?' tih sawiho a ni a; uluk taka zir chian a nih hnuah rawtna siam a, ngaihtuah leh atan an dah. 

Mizoramah Covid-19 posi­tive an pung zel a, sorkarin positive-te enkawlna tura a siamah an leng lo ṭan tawh. Tunah hian kohhran leh YMA hmunhmate pawh an hmang hawh ṭan dawn tawh. Hetihlai hian hmun danga an kalpui anga mahni ina Covid-19 kai, natna lang chhuak lote enkawl dan chungchang pawh sawiho a ni ṭan ta. 

He hripui kan hriat tirh kha chuan in lama positive enkawl hi chu sawi rik ngam pawh a ni lo a, state pawn aṭanga lo haw in lama khung hran (home quarantine) takngial pawh kan kalpui ngam lo. Tunah erawh he hripui hi kan hre chiang ta tawlh tawlh a, a hlauhawm ta lo sawt tih lam aiin a inven theih dan leh a hlauhawm dante kan hre chho ve zel a, mipui pawhin Covid-19 kan thlir dan zawi zawiin a inthlak ṭan niin a lang.

Covid-19 positive vei-in chenna in a neih ṭhat a, inkhung hranna tur a neih bakah amah enkawltu tur lam a inngaihtuah theih chuan an veng leh khaw hruaitute remtihna laa mahni ina inenkawl phalsak pawh hi a hun chho dawn a ni mai thei. Hetihlai hian ngaihtuah tur leh zawhna tam tak a awm dawn a, chu'ng zingah chuan, 'A him tawk em?' tih hi zawhna chhan harsa tak a ni ngei ang.

Hripui vei chhungte tan chuan anmahni hmangaihna nen, damdawi-in emaw Covid Care Centre (CCC) emaw pan ai chuan mahni in lum ngeia enkawl chu a thlanawm zawk ngei ang a; amaherawhchu kan veng leh khaw dinhmun en chung leh, kan chenna in in hnaih dante thlir hian a him tawk dawn nge dawn lo tih erawh bûk a ngai hle ang. Tute emaw nawrna avangin positive-te in lama inenkawlin hri hi an tidarh palh a nih chuan kha chen hah taka kan invenna kha a thlawn palh thei tih chhut tel a ṭha ang.

Engpawhnise mipui nawl­puite in lama enkawla rem lo a nih pawhin tar leh nu-nau zingah symptom nei lem loa Covid-19 positive an awm a nih chuan in lama enkawlte pawh a remchang zawk thei. Hmun danga an tih anga kal ve ringawt loin, Mizoram mil tura ngun taka ngaihtuah erawh a ṭha zel ang.