Nuai 12,700 man bazar

Zuangtui/Muanna Vengah bazar hmunpui Unity Mall sak a ni dawn a, hemi atan hian Finance Ministry aṭangin SASCI Part VI 2023-24 hnuaiah cheng nuai 12,700 hmuh a ni a; he mall sak tur hi tourism leh mahni kutkawiha eizawngtute hmasawnna tur leh inpumkhatna atan ruahman a nih thu Chief Minister chuan a tarlang.

Aizawl khawpuiah mall lian leh changtlung tak a awm thar tur hi thil lawmawm tak a ni a, ruahman lawk ang hian ṭha tak leh tluang taka sak theih ni se, sum hman dan leh a sak danah pawh a ziaka awm angin fimkhur leh dik taka hman ni se a lawmawm lehzual ang.

He mall sakna hmun hi hetia thlir mai chuan mi nawlpui tan pan a buaithlak deuh dawn a, a kawngpui hi an zauh a nih loh chuan traffic jam avanga harsatna thleng thei tur a tam hle. Khawpui daifem hmun fianral leh thengthaw nuam tak ni chiah si lo, khawpui lailum aṭanga hla tak pan ngai, mipui chenna hnai hmun chep angreng tak ni bawk si hi; tourist hipna ṭha takah a chhuak lo palh mai ang tih a hlauhawm.

A sakna senso hi sorkar laipui aṭanga a thlawna dawn a ni lo a, sorkarin a rulh leh tur a ni tih hi kan hriat tel a pawimawh a, Mizoram sorkarin he bazar hmunpui (mall) sakna senso nuai 12,700 hi mipui sum aṭanga a rulh leh tur a ni dawn a, mipuiin he mall hi an duh lo ni loin, rulh leh tur sum pukna atan thil ṭul berah an ngai kher lo ang.

Tourism department-in mall an buaipui ta daih te, a sakna hmunah Chief Minister bial chhung an thlan dan te, sum puk leh rulh leh tur a nih dan chhût hian Mizo mipui lung a awi kim lo palh ang tih a hlauhawm hle a ni.