Kan ram buh thar

Agriculture Minister chuan Mizorama buh tharte state páwna a chhuah nasat thu a sawi a, "A bikin Kolasib leh Mamit district-ah leilet kan nei tam. Heng kan leilet neihna hmunte hi Mizorama rice bowl tia koh theiha mawi, hmunhma kan ngahna hmun a ni. Tam tak thar chhuah theihna leilet zau tâwk kan nei chungin, leilette hi a neitute'n enkawl hlei thei loin, hnam dangin an enkawl hlawm," a ti.

Agriculture Minister thusawi hian ngaihtuah a tithui hle mai a, Mizoram chhungah leilet buh kan duh em em laiin, kan thar ang chhun chhunte state pawnah a chhuak nasa a nih chuan a fel lo hle a ni. Hetihlai hian state pawna buh thar a chhuah chhan erawh zir chian a ngai a, leilet neituten an enkawl theih loh vang emaw, an enkawl peih loh vang emaw a nih chuan Mizoram chhunga hnam dangin leilet an nei chu ngun zawka ngaihtuah nawn pawh a ṭha ang.

Hetihlai hian sorkar pawhin tih tur a nei a, kan rama kan buh thar chhuah zat pawh mumal zawka chhinchhiah a ṭha a, data rintlak neiha thil awm dan zir chian a ṭha ang. Kan rama leilet neih zau lam aṭanga chhûtin, kan thar chhuah theih zatte pawh teh a ṭha ang a, eng zât chiah nge kan thar chhuah a, tute nge a hlawkna tel a, tu kutah nge pawisa a luh thlenga kan zir chian loh chuan kan ramah hnam dangin kan leilet ngei hmangin sum an siam thei a, inven a ṭha hle.

Kan rama buh kan thar tam loh tehlul nen, mumal lo taka state pawna a chhuak reng a nih chuan a dan theih dan ngaihtuah a ṭha ang a, chutih laiin ram nei ringawta enkawl leh si loin state pawn mi kuta an ram an hnutchhiah lohna tura ven a pawimawh tel bawk awm e.