Inthlan dawna intiamna

Mizoram Government Lumpsum Aided Higher Secondary School Association (MIGLAHSSA) hnuaia sikul pakua chuan kum 2018 inthlan dawna tuna Chief Minister leh Minister ṭhenkhatte intiamna tihlawhtling phûtin sikul an khár mêk a, adhoc grant in aid dinhmuna dah an phût a ni.

Inthlan dawn hian mipui tihlawm an tum avang leh vote an duh avangin political party-te hian thutiam an nei ṭhin a, heng thutiamte hi mipuiin an hre reng ṭhin. Kum 2018 inthlan dawna thutiam langsar ber chu 'chhungkaw tin Rs 3,00,000 sem' kha a ni a, Mizoram mipui khawsak harsa tak tak tan chuan Rs 3,00,000 tiamtute thlan tlin mai kha thil àwm tak a ni.

Sorkar thar a piang a, state-in sum a hmuh dan tur an ruahman lawk si loh avangin sorkar laipui aṭanga sum lo kal ringawt chuan intiamna tihlawhtlin rual a ni ta lo a, Rs 3,00,000 tiam siin Rs 25,000 an sem ta a, mipui làwm a kim lo.

Sorkar lamin a pûk theih theih a pûk chung pawhin sorkar hnathawk hlawh pawh a hunah a pawi chhuak hleithei lo a, chutihlaiin kum 2018-a an intiamna hrang hrang hmangin sorkar an nawr lèt ve mêk si a, inthlan dawna vote duh vanga tihlawhtlin theih loh intiam hi kalsan a hun tawh hle a ni.