SEDP leh PAHOSS a hlawhchham em?

Congress Legislature Party (CLP) Leader chuan, MNF sorkar flagship programme Socio Economic Development Programme (SEDP) leh Chief Minister-in a duan chhuah Parking House Support Scheme (PAHOSS)-te chu a hlawhchham chiang hle niin a sawi.

Congress Legislature Party hotupa chuan MNF-in kum 2018 inthlan dawn khan Rs 3,00,000 sem an ti a, chu chu an sorkar phah nia sawiin MNF chu mahni thutiam tihlawhtling lo mai pawh ni lo, Rs 3,00,000 tiama Rs 25,000 leh Rs 50,000 lek an semah a puh a, SEDP chu a hlawhchham thu a sawi.

Pawisa sem aṭanga teh dawn chuan SEDP hi a hlawhtling tia sawi ngam a ni lo a, an intiamna zatve zatve leh pawh an sem theih si loh avangin a hlawhchham tia puh hi a mak lo. Mipuiin an beisei leh an ngen vang pawh ni loa inthlan dawna vote duh avanga sem leh theih loh tur intiam hi a zia lo hle a ni.

PAHOSS hi sum tam tak senga mi liante lirthei dahna tur a thlawna siamsakna a ang ta hle mai a, 'parking' hi an thupui a nih laiin tuna an kalpui chinah hi chuan 'garage' a ni ber a, traffic jam tihziaawmna kawngah a pui lem lo.

Sorkarin intiamna lian tak a neih SEDP a kalpui dan leh Chief Minister-in a duan chhuah PAHOSS kalpui dan hi en ila, a hlawhtling kan ti nge a hlawhchham kan ti zawk?