Lengpui Airport-a CM hèkna thu kal zel

Lengpui Airport tihchangtlunnaah dan bawh-chhiatna a awma ngaiin Mizoram First Movement (MFM) chuan mawhphurtua an ngaih, Chief Minister Zoramthanga chungchang chhui turin April 11, 2022 khan Lokayukta-ah ngenna an thlen. Lokayukta chuan hemi chungchangah hian dan hre mite ngaihdan (legal opinion) a la tawh a, thutlukna erawh a la siam lo.

MFM hian PWD enkawltu Chief Minister chu a thuneihna hmang sual leh chhungkhat lainá duhsak uchuakah an puh a, India Danpui Article 14 a bawhchhiat avang te, General Financial Rules 2017-a Rule 162 leh Vigilance Commission thuchhuah hrang hrangte a bawhchhiat avangin Prevention of Corruption Act, 1988 hnuaiah thubuai siamsak ngei turin Lokayukta-ah an thlen.

He thilah hian Lokayukta chuan GAD leh PWD chu thil awm dante zawtin document pawimawhte a dil a, document zir chian hnuah Lokayukta chuan MFM-in CM Zoramthanga an puhna chu chhui zui tlakah ngaiin, chhui turin ACB an hriattir ta a ni.

He thil kal dan hi ngun taka chhui chuan thil mak tak tak a awm a, lehkha lam tihfel hmain Lengpui Airport sak hna hi ṭan a ni a, Covid-19 hripui a len vanglai tak pawhin Chief Minister hian a tlawh ṭhin a, vanduaithlak taka airport a chim hnuah pawh contractor chu kai sàntir a ni ta hlauh a, Lengpui Airport tihchangtlunna tura hna kalpui dan hi chu a mám zàn lo tih chu phat rual a ni lo.