Mizoram hriselna tura sum pûk hmanna hi

Health & Family Welfare Minister chuan, hriselna lama Mizoram hmélhmang tidanglam dâwrh tur project kalpui mek a nih thu a sawi a; Mizoram sorkar leh World Bank thawh dunna project, Mizoram Health System Strengthening Project (US dollar 40 million project) kalpui mek a nih thu sawiin, "He project hi tihhlawhtlin a nih hunah chuan hriselna kawnga kan state hmelhmang thlak danglam dâwrhtu tur a ni," a ti.

Hriselna kawnga Mizoram hmelhmang thlak danglam thei tur thil hi a lawmawm takzet a, a kal zel dan tur pawh mipuiin nghakhlel takin an thlir zel ang.

Hetih lai hian he project ropui tak tura ngaiha an thil kalpui tawh a sawi erawh 'construction' lam hawi bawk a ni leh ta a, kan ram hruaitute hmasawnna sawi hi he lam hawi zawng deuh zel a ni hian ngaihtuah a tithui.

Health Minister sawi danin he project hnuaiah hian district thar pathuma Chief Medical Officer pisa sak zawh tawh a nih thu kan hmu a, hetiang building sakna tur maia World Bank sum kan pûk hi chu a uiawm khawp mai.

State dangin health lama hmasawnna tura PMJVK aṭanga pawisa ṭhahnem tak tak an dawn theih laiin; Mizoramah chuan Health Department project a tlang ve thei tlat lo a, World Bank aṭanga kan sum pûkte lah chu CMO office sakna atan te, hospital building chei ṭhatna atante leh construction work atana hman a ni a, mipui sum aṭangin a pung awma rulh a la ngai zui dawn nen, lawm a kim ṭhin lo.

Kan rama hriselna dinhmun chawi kanna tura sorkar hmalakna hi a lawmawm rualin a sum lo kal dan, a rulh leh dan tur leh a hmanna en hi chuan, state dangte tih theih PMJVK suma Health department kan tichangtlung ve thei lo hi chu a pawi takzet a ni.