Mipuiin an awm dan tur hre rang thei se

Aizawl khawpuia lockdown puan mek chu November 9 zing dar 4:30-ah a tawp dawn a, he mi zawhah hian lockdown hi pawhsei a ni zel dawn nge, inkaihhruaina thar siamin sorkarin ruahmanna thar a nei dawn tih puan a la ni lo. 

Covid-19 hri kai an pun zel avangin mipui himna turin Aizawl khawpuiah sor­karin lockdown (restriction) a kalpui a, sawisel tawk mi tam tak awm mah se sorkar hian mipui tam berte ṭhat tlanna tur leh himna tur a nih beiseiin he thutlukna hi a siam a ni. Sorkar tan pawh rorel thiam hi thil harsa tak a ni a, locodown duha nawr reng pawl an awmlaiin lockdown duh lo leh sawiseltu tam tak an awm ve bawk a, thlir dan a inang lo hle a ni. 

Sorkar hian eng thutlukna pawh siam dawn se chawpchilh lutuka thil kalpui hi a fuh lo a, a tûk aṭanga lockdown tur tlai lama puan chauh mai te, lockdown pawhsei tur chungchang chawp­chilh tak taka puan a nei ta fo mai. Mi tam takin a tuka an tih tur an ruahman lawk a, hnathawh tur, zin chhuahna tur leh thil ṭul dang tam tak an ruahman lawk ṭhin a, sorkarin chawpchilh taka thutlukna a siam leh ṭhin avangin mi tam tak an buai phah ṭhin. 

Tunah hian kan hma lawkah tuna in­khuahkhirhna (restric­tion) hman mek hi a tawp dawn a, sorkar hian a pawt­sei dawn a nih chuan a hma lamin thu chhuah se, inkaihhruaina thar nen Aizawl khawpui hi an enkawl dawn a nih pawhin chu thuchhuah chu rang takin siam tawh se. A tuka an khawsak dan tur hre loa mipui dah reng hi mipui harsatna belhchhahtu a ni.