VIP pual CCC leh in lama inenkawlna

Mizoram sorkar chuan khum 28 awmna Covid Care Centre (CCC) chu New MLA Hostel, Khatla-ah a buatsaih thar a, sorkar hriattirnaa a lan danin he CC hi VIP-te pual bik a ni. Hetihlai hian September 14-a zir chian tura an tih Covid-19 te in lama enkawl theih dan (home isolation) chu September 15 khan kalpui theih a nih thu an puang bawk. 

Tun ṭum hri lengah hian Mizoram hi a che ṭha leh hri dona kawnga thawk ṭha ber pawl kan ni a, chu chu VIP-te fel em vang lam ai mahin mipui ṭan rualna vang a ni. Ramri vengin ram hna ṭul lai takin hna ṭhulhin patling an in pu chhuak a, zan tam an riak bo a, khawpui chhungah ni se chhungkuaa awm hman mang loin task Fotce member-te an hmanhlel.

Sorkarin thawktu a neih sate bakah hlawh nei loa thawk turin thiamna bik nei ṭhalai rual an inpe a, sorkarin hri dona a kalpui mek tichaka frontline worker ni turin mahni inthâpin an inpe a; hetiang boruaka kan awmlaia VIP bik enkawlna tur CCC lo siam hi thil inhmeh lo tak a ni.

He hripui kan do mek hi kan zavaia thawhhonaa do chi a ni a, khawilaiah emaw inthlahdah bik an awm chuan kan zavaiin kan tuar thei a, team work ṭha kan mamawh hle. Ṭha taka inlungrual taka kan thawhho lai a, tute emaw bik enkawlna tur a hranpaa siam hian a hmatawnga thawktute a tihnual palh ang tih a hlauhawm hle. 

September 14-ah pawh chawhnu lama an ṭhutkhawm hnua sorkar thuchhuah khan, "COVID-19 positive asymp­tomatic-te chungchangah an dinhmunin a tlin a, khawtlang hruaitute pawhin rem an ti a nih chuan in lama inenkawl, 'Home Isolation,' kalpui hi a ṭha zawk em? tih chungchang sawiho a ni a, uluk taka zir chian a nih hnu-ah rawtna siam a, ngaihtuah leh atan tih a ni," tih kha a ni a; a tûk mai September 15-a uluk taka zir chiang hman leh ngaihtuah nawn hman ni awm taka home isolation an phal ta thut pawh hi mipui lam an inring hman lo ang tih hlauhawm tak a ni. 

Engpawhnise Covid-19 hi thil thar a ni a, kan zavaiin kan inzir mek a, sorkar lam tan pawh tihfuh leh tihfuh tawk loh thil tam tak a awm thei a; tlawma la loa thutlukna sûta a siam ṭha zung zung ang khan, thutlukna ṭhenkhat pawh hi mipui zah vanga an ennawn leh ngam a nih chuan mipui fak an hlawh hle ang.