Sorkar hnathawk hlawh lâk hun

Mizoram sorkar hnuaia hnathawktute chuan August, 2023 hlawh chu September 6 thleng khan an la la thei lo a, hlawh pek chhuah hun tur hriat a ni lo.

Covid-19 hripui len vanglai khan Mizoram sorkar hian a hnathawkte hlawh hi a pe chhuak hleithei lo a, hlawh indaih loh avangin sorkar pawh a buai ṭhin hle. Hripui a reh hnuah pawh sorkar hnathawk hlawh pek chhuah tlai hi a reh ve thei meuh lo a, tun hmaa last working day-a hlawh lâk ang kha a awm thei ta lo.

Sorkar hnathawkte rilru natna belhchhah thei turin Finance department enkawltu Chief Minister chuan February 13, 2023-a press conference-ah, "Mizoram sorkar hian hlawh hi pek theih lohkan nei lo ang tluk a ni a. Thla thar ni khatah emaw, thla tawp ni 31-ah emaw kher kher kan pek theih lohna chhan chu, kutah, kan pawisa hmuhna ber share tax te, khangho rawn kal kha a tlai ta si a, thla chanve ahte kan pe a ni... Ni 1-a pek a, a thla leha ni 1-ah pek leh emaw, ni 15-a pek a, a thla leh ni 15-a pek pawh kha a amount a inang reng tho a, a danglam lo reng reng," tiin a lo sawi tawh.

Sorkar hnathawk hlawh lâk tlai hi loan latuten an tuar a, sumdawng a nghawng a, a nihna takah chuan chhungkaw tin a nghawng. Thlà tirah in luah man pek a ngai a, bill hrang hrang pek a ngai a, loan rulh a ngai a, naupang sikul fee pek a ngai a, chhungkaw tam tak an rûm phah lai a; a pawisa zat a ngai reng intihsan hi inzah lohna ang hial pawhin a puh theih a; a thlawna sum sem tur nei sorkar hian a hnathawkte hlawh hi a hun takah pe ṭhin tawh rawh se.