AR insawn hun tur

Aizawl khawpui laili aṭanga Assam Rifles insawn chhuah tura Mizoram sorkar leh Assam Rifles ten memorandum of understanding (MoU) an duan (draft) chungchangah Ministry of Home Affairs (MHA) aṭangin chhanna dawn a la ni lo.

Assam Rifles leh Mizoram sorkar hian Aizawl khawpui aṭanga AR-te an insawn chhuah theihna tura ṭul leh pawimawh hrang hrangte an dang dun a, an pahniha duh dan tarlan ve ve a nih hnuah draft MoU an ziak a; draft MoU chu MHA hnenah thawn a ni a, an thawnna rei deuh tawh mah se, MoU chungchangah Assam Rifles chuan tun thlengin MHA aṭangin thu dawn an la nei lo.

Assam Rifles hi chhuak turin duh hle mah ila, a chhuahtir theitu hi Mizoram lamah an awm lo a, thuneitu lamin ṭan an khawh tlat avangin an chhuak lo a ni ber mai. Hei hi nawr chhuah tumin sorkar pawhin theihtawp a chhuah a, kawng hrang hrang a dap a, a la hlawhtling thei lo.

Assam Rifles sawn chhuah hi state sorkar tih theih a ni lo a, chu chu tuna kan buai chhan pawh hi a ni. Aizawl khawpui aṭanga an chhuahna tur hmunhma pawh Union Home Minister meuhin a hawng tawh a, Chief Minister hoin an chhuah theih dan tur an rel reng chungin an la chhuak hauh si lo.

Assam Rifles sawn chhuak theitu chu Ministry of Home Affairs an ni a, an chhuah loh hi state sorkar chak loh vang a ni lo a, an chhuak a nih pawhin state sorkar nawr chhuah ni loin; Home ministry lam thutlukna a ni ang.