SEDP an sem leh dawn

Deputy Chief Minister chuan September 2023 chhungin SEDP second phase sem hman tum a nih thu a sawi a; hripui léng vangin Mizoram sorkarin harsatna tam tak tâwk mah se, sorkar flagship programme SEDP first phase-ah mi 60,000 hnenah ṭanpuina pek a ni tawh tih a sawi a, "Second phase-ah mi 60,000 bawk tuamin September thla chhung hian sem chhuah hman tum a ni," a ti.

Mizoram sorkar flagship programme SEDP hnuaiah pawisa sem kalpui mêk a ni a, chhungkaw 60,000 zet chu SEDP hi pek an ni tawh a, a thawh hnihnaah chhungkaw 60,000 pek an ni leh ang.

Sorkarin mi retheite lei rem an rah theihna tura a duan, SEDP hi a tira an sawi ang khan kalpui thei se thil lawmawm tak, dinchhuahpui tham tur a ni a, Rs 3,00,000 mai pawh ni lo Rs 3,00,000 aia tlem lo min sem tur thu Chief Minister-in a campaign laiin a sawi a, chu mai chu ni loin duhthawh takin NLUP dawng tawh pawhin an dâwn leh tur thu a sawi.

A taka an sem theih zat erawh chu Rs 25,000 te te a ni a, vawi hnih an sem hman a nih pawhin Rs 50,000 a ni dâwn a, an pawisa sawi zat leh a taka an sem zat hi a inthlau ta lulai hle a ni. Vote duh leh beisei avanga inthlan dawna thil intiam leh sawi uar lutuk ṭhat lohzia a takin a lang mek a; an sorkar hnua Rs 3,00,000 semna tur zawttute chu Minister hialin 'máwl' tiin an chhuah duh a, tunah an insawi ang an sem leh thei ta si lo.

Engpawhnise, sorkar pawisa sem hi political party ram lakna hmanrua hman tumin party unit lamin nasa takin a buaipui mek a, sorkar official thlan tur ni awm tak, tuna kan kalpui dan en hi chuan din chhuahpuina tur leh intodelhna lam aiin, 'inthlan hmaa sorkar pawisa sem hman hrim hrim tumna' a ang ta ber mai.

Rs 3,00,000 beiseitute hnena Rs 25,000 sem turin sorkar a inbuatsaih mek a; a dawngtu lam tan chuan a thlàwn a nih miau avangin lawm taka lo dawn mai a ṭha ber ang.