Sipai bangte dinhmun

Mizoram Ex-Services League chuan tun hnai khan Vanapa Hall-ah General Assembly vawi 34-na an hmang a, Home Minister-in a hmanpui. MESL President kaihhruaiin ro an rél a; an rorel zingah, 'Mizoram sorkar hna laknaa ex-servicemen-te reservation chungchang chu High Court-ah petition thehluta kalpui ni se,' tih a tel.

State sorkar hian group C leb group D hna lakah sipai bâng tan quota a nei a, hei hi a nihna taka kalpui a ni lo. Sipai bangte hi sorkar laipui hian a duat em em a, Ex-servicemen (Re-employment in Central Civil Services and Posts) Rules, 1979 hnuaiah sipai aṭanga an chawlh hnua hna an hmuh leh theihna turin ruahmanna hrang hrang a siam a ni.

Mizoram sorkar hian sipai bangte tana sorkar hnaa an luh leh theih dan hi siam mah se, a taka kalpui a harsat rih hle. Sipai bangte chauh ni loin a ngheta thawk tura sorkar hna lak hrim hrim pawh a kalpui hleithei lo a, a lâk chhuna sipai bâng quota pek zel hi harsa a ti a nih a rinawm.

Hetihlai hian danin a phût anga kalpui a nih loh erawh chuan Court-ah dan hmanga dikna an zawn chuan sorkar hi a thiam lo zawkah a ṭang palh thei a, inremna awm thei se thil ṭha tak a ni ang.