Kuhva rah tawlh ‘ruk’ chungchang

Mizoram Police chuan thuchhuah siamin, Mizoram police-te man tawh sa kuhva rah chu Assam Rifles-in man nawn lehin, an man anga media-a an puanzar chungchang chu an sawifiah a; kuhva rah chu police-in an man loh thu leh, hei vang hian Sangau OC suspend a  nih thu an tarlang. 

Tun hnaia Mizoram thil thleng zinga dang­lam tak pakhat chu kuhva rah man loh avanga Sangau OC suspend chungchang hi a ni. He thil thlen dan leh Mizoram kaltlanga kuhva raha sumdawnna lian tak kal reng mai hi a hre chiangte tan chuan nuih tiza pawh a ni thei hial awm e. 

Mizoram Police man sa kuhva rah tam tham tak chu Assam Rifles-in an man nawn leh angin MLA pakhat chuan a sawi a, he thil hi Mizoram police tana a tlawmthlak thu leh Mizoram sorkar a demna thu a sawi chhuak. He mi hnu hian he kuhva rah man/ man loh chungchang hi chhui zui a ni ta a, dan loa tawlh ruk kuhva rah hi hre reng chungin Lawngtlai SDPO a biak rawn hnuah Sangau OC hian man lohin a kal tlangtir a; chu mai ni loin man a nih lohna turin a pui hial a ni. Hei hi Assam Rifles lamin an lo man leh ta si niin Mizoram Police lamin an sawi. 

He thil hi mi naran (layman) tan zuk hriat fiah ve theih a ni lo a; nimahsela mipui nawlpui pawhin kan hriat chian em em mai chu Myanmar leh India kuhva raha insumdawn tawnna kawngpuiah Mizoram hi ualau leh zalen taka hman a ni a, heng kuhva rahte hi an man ngai meuh lo. Tlemlai deuh khan kuhva rahte hi Kolasib district lamah man a ni a; nimahsela mi thiltithei deuhte an che nge ni, an man zui leh ta lo ni awm tak a ni. 

Kuhva rah hmanga sumdawnna hi lian taka kalpui a ni a, cheng maktaduai tam tak man hi a kal tlang reng tih mipuiin an hria. Zokhawthar-Champhai-Aizawl inkar kawngpui pawh hi kuhva rah phurtute rah chhiat ang hiala sawi ṭhin a ni a; Champhai leh Zokhawthar inkarah hian dan loa sumdawnna anga tuna an sawi kuhva rah leh leiṭha dahna kudam tam tak ualau taka siam a ni. 

A changa police suspend-na khawp hiala 'dan bawh­chhiatna' nia kan buaipui kuhva rah hi ualau taka tawlh a ni reng si a, he thil hi dan lo a nih ngai chuan a zavaia tihtawp vek ni se, thil awm dan dik tak hi mipuiah puanzar ni rawh se.