Rs 3,00,000 ruahman dan hriat a chakawm

Agriculture Minister chuan, MNF kaihhruai Mizoram sorkar flagship programme Socio-Economic Development, Programme (SEDP) hnuaiah vawi khatah Rs 3,00,000 inpek theih a nih loh avangin a tahtawla Rs 3,00,000 sem tura ruahman a nih thu a sawi.

Kan state sorkar au hla ber pakhat chu SEDP kal tlanga Rs 3,00,000 sem a ni a, hei hi kum 2018 inthlana mipuiin an thlan tlin chhan berah pawh a puh theih ang. Chhan hrang hrang avangin an intiam ang sum hi an la sem thei lo a, a chhan bulpui bera an chhuanlam siam chu Covid-19 hripui len vang a ni.

Hripui lêng karah harsa takin SEDP sum hi Rs 25,000 te tein an sem thei hram a, instalment hnihah sem niin Rs 50,000 dawng pawh eng emaw zat an awm tawh. Hetihlai hian MNF intiamna chu Rs 3,00,000 a nih miau avangin an intiamna aṭanga mipuia an bat chu Rs 2,50,000 zet a la ni.

Hripui lêng hi SEDP lamah hian chhuanlam tling tak a ni mai thei a, nimahsela thil dangah chuan hmasawnna hna hu a kal tho niin a lang. Hripui karah kan mamawh ber ni lem lo a kan la awm theih airport chei ṭhat hna kalpui niin Chief Minister ngei pawhin hripui len laiin a tlawh ṭhin a, khelmual hrang hrang siam a ni a, hman rim loh tur kawngpui siam hnate kalpui niin khawpuiah tuiluankawr ṭhalai chhu chhiain an siam nawn mêk bawk a; hetiang hnate kalpui dawna hripui chhuanlama hman si loa Rs 3,00,000 sem theih loh chhuanlama hripui puh hi thil mak tak a ni.

Rs 3,00,000 hi sem tum mek a nih thu Cabinet Minister meuhin a sawi chhuak thar leh a, ruahmanna pawh a awm thu a sawi a, a sem tur ber a sum erawh a la awm lo niin a lang.