Ram pawna hnathawh

Mizoram State Commission for Women (MSCW) chuan, ram danga hna thawk tura Mizote tir chhuaktu agency 26-te chuan danin a phût ang lehkha pawimawhte an nei lo vek tih a tarlang a; agency-te leh Mizo hmeichhia ram danga an thawn dante chu chhui zui turin Mizoram Police-a CID (Crime) a hriattir.

Mizo hmeichhia ram pawn lama hnathawk ṭhahnem tak an awm ta hi a lawmawm a, chhungkaw tam tak tán eizawnna ṭha tak an siamsak a ni. Hetihlai hian an kal dan, a tirtute rintlak dan chin leh an awmnaa an hnathawh dante thlengin hriat chian hmasak a pawimawh hle tih; tun hnaia thil thlengah a lang chhuak.

Eizawnna kan duh avangin ram hla zawk pawh kan pan vang vang a, a hmun leh a mi chengte pawh hriat chian lohte an nih ṭhin avangin fimkhur pawh a ngai hle. Hei vang tak hian kal chhuah hmain a tirtu lam hi kan hriat chian a ngai a; hna duh luat avang leh ram pawna kal chhuah hlan nghahhlelh luat avangin hmun hlauhawm leh chin hriat chian lohah pawh kan chhuak mai ṭhin a, fimkhur thiam a ngai hle a ni.

Tun hnaia thil thleng avang hian ram pawna hnathawh hi a hlauhawm ta thut hran lo a, dan ang thlapa kan kalpui thei a nih chuan ṭhalaite tana eizawnna ṭha tak a ni. He eizawnna hi tihtawp ngawt chi a ni lo a, dan hnuaiah felfai zawka kalpui theih dan ngaihtuah ni thei se a lawmawm ang.