Mizoram Police dinhmun

YMA Central Coordination Committee (CCC) meeting vawi 97-na tun hnaia neih chuan YMA Inkhawmpui Lian agenda atan Mizoram sorkarin armed police battalion, pakhat tal a din belh theih nan hmalak rawtna an pawm.

YMA CCC meeting hian agenda an la thlitfim chauh a ni a, he thu hi thurel a la ni chiah lo chungin ngaihtuahna a tithui hle. Mizorama kan police dinhmun en hian post ruak a tam em em mai a, chu chu sorkar sum dinhmunin a zir loh avangin a hnawh khat thei lo. Hetihlaia armed police battalion hran din leh tur hian Mizoram sorkar hian sum a nei lo mai thei a, engtia kalpui tur nge hriatthiam a harsa hle.

Thil ngaimawhawm tak chu kan police neih tlem piah lamah kan police zingah chhawr tlak mang loh an tam em em mai hi a ni a, police an thi nasa tih sawi a ni ṭhinte hi a pawi hle a ni. Keini state lo hi police ngawlvei puala camp leh intuaitharna nei pawh hi an awm kher lo mai thei a, kan police dinhmun en hian a lâk danah zawhna a piang lo thei lo.

Mizo ṭhalai zingah zu leh ruihhlo avanga buai hi tam hle mah se, hetiangin a tihbuai loh hi mi tam zawk an ni a, Police-a ṭang duh Mizo ṭhalai pian ṭha tak, thiamna leh pumruaah pawh fit ṭha tak tak an awm laiin; kan police ṭhenkhat en hi chuan politics avanga duhsak zawng lâk an awm ngeia puh loh theih pawh a ni lo a, dan ang takin open advertisement nen fel leh dik takin police hi lâk ni tawh rawh se.