Aizawl lei min leh thuneitute

Zohnuai Ṭhalai Ṭangrual Pawl (ZṬṬP) chuan Vaivakawn Zohnuai huam chhungah chhiatrupna thlen thei leh mi dang tana tawrh theihna thlen thei tur àwmah, mumal taka enpuina nei loin permit reng reng pe tawh lo turin sorkar thuneitute an ngen a, "Chhiatna thleng hi vanduaina a nih piah lamah thuneitu fimkhur tâwk loh nghawng nia a lan avangin pawi kan ti hle. Tun hnuah chuan Vaivakawn Zohnuai area-ah chhiatrupna thlen thei leh, mi dang tana tawrh theihna tur àwmah mumal taka enpuina nei loin eng permit mah pe tawh lo turin sorkar thuneitute kan ngen a ni," an ti.

ZṬṬP thuchhuah hi ngun taka ngaihtuah ngai a ni a, Aizawl khawpui chhungah hi chuan lei laih phalna neih a ngai a, in sa tur pawhin permit neih a ngai a, heng permit-te hi awlsam taka neih theih a ni lo. Aizawl Municipal Corporation a din hnuah lei laih leh in sak dan nasa taka siam rem niin phalna lâk ngai a tam ta hle a, heng phalna neih hma hian dan ang chuan mi thiamten an enpui vek tura tih a ni.

Aizawl khawpui lei min tam tak hi chu amaha min ni loin lei laih vanga min a tam hle mai a, sorkar/AMC permit neia lei lai ni si; lei a min hian eng anga hmalak zui tur nge, tih hi tihchian a ngai khawp mai.

Kawngpui pawimawh ber berte chu tute emaw lei laih nghawng avanga lei minin a tiping fo a, sorkar pawisa hmanga thenfai niin a paihna senso thleng hian sorkar lamin an tum niin a lang. Heng thil hi uluk zawka ngaihtuah a, dan hmanga awmze nei taka ruahmanna siam fel a pawimawh takzet a ni.