Sorkarin pawisa a nei lo tak tak em?

ZPM Legislature Party (ZLP) leader Lalduhoma chuan, Covid-19 dona atana hman theih tur sum tam tak a awm chungin Mizoram sorkarin mipui hrêk zawngin hma a la zui zel tih sawiin, "Tunah chuan quarantine centre-a awm man chawi a ngai ta a, RT-PCR-a sample test-na man pawh chawi a ngai ta zel a ni," a ti a; swab test man chu state dang nena khaikhinin, Mizoramah a to uchuak bik hle a, mi harsa zawkte'n an inendik ngam loh phah thu a sawi. 

ZLP leader chuan,  Covid-19 dona atana hman theih tur sum hmuh tawh dan leh sorkar hotute chêt dan enin, Mizoram sorkar chu sumah a harsa lêm loa a lan thu sawiin, "Session-a zawhna chhannaah, restricted tender ringawt pawh 105, cheng nuai 68,974 man lai an la pe thei a, a hmutu tur chiang saa tender chhuah thlengin an ti thei reng a ni," a ti a; pawisa dinhmun hrang hrang a sawi rualin SEDP-ah nuai 51,300 dah a nih bakah, CM-in Assembly House-a a sawi angin, damlo apiang hman turin chhungkaw tin tan Rs. 2,00,000 ṭheuh dah a ni, tiin a sawi.

Mizoram sorkar hian pawisa hi a nei lo tak tak nge, Covid-19 dona atan bik hian pawisa nei lo angin thil dang atan pawisa hi a la dah ṭha thei zel, tih hi zawhna awm thei a ni. Mahni hnathawkte hlawh pûk duh khawpa tla chhia anga a lan laiin insum theihna tur ṭhenkhatah an insum miah lo a, minister ṭhenkhat phei chuan pawisa tamzia uar takin an la tlangaupui mek a ni. 

Sorkar sum hi in hman pawlh theih loh, a hmanna tur awm sa bika dawn tam tak awm bawk mah se, hripui lenlaia thiam taka sum enkawl chuan thil danga insûm hleka a dang atana khawl theih chin a awm. Hei bakah hian Mizoram sorkarin a mamawhna apianga a hma theih sum bawm lian tak a nei sa a, hetihlaia mipuiin hri dona atana an thawh Chief Minister's Relief Fund aṭanga sorkar suma lei tur chi khawl hrang hrang leite kha thil mak tak a ni. 

Covid-19 hi Assembly House-a budget a pass laia chhût tel loh a ni a, loh theih loha sum hman chhuahna a tam tak avang hian sorkar tan pawh a luhaithlak hle ang tih a chiang. Hetihlai hian sorkar hian a sum neih ang ang hi tun aia ṭha leh langtlang zawk hian enkawl se; mipui thawhkhawm sum a hmanna lam pawh insum se, sorkar infrastructure atan chuan sorkar sum hmang tawh se. Sorkar harsa tak kan nei a nih chuan mipui pawhin an theihna zawna puih chhunzawm zel an hreh hauh lo ang.