Min luhchilhtu hri hlauhawm zawk?

Mizoram State AIDS Control Society (MSACS) chhinchhiah danin, kumin March-July inkar, thla nga chhung khan Mizoramah thisen (blood sample) 19,471 endik a ni a, chu'ng aṭang chuan HIV hrik pai mi 833 hmuh chhuah niin, chawhrualin ni khatah mi 5.44 zel hmuh chhuak ang an ni.

Khawvelin Covid-19 a buaipui a, khawvel a chawk buai a, hetihlai hian natna dang leh hri hlauhawm dangte hi ngaihthah chi a ni lo ang. Mizorama kan buaipui ber ṭhin pakhat chu HIV/ AIDS a ni a, Covid-19 kan buaipui tak avangin sawi a hlawh vak lo a; nimahsela a buaipuitu lamin thil awm dan an han puang chiah chu kan ram dinhmun a ṭha lo hle tih a lang leh ta. 

Covid-19 hi chu kai chhan hrang hrang a awm thei a, inven tum pawha inven hleihtheih loh a nihna chin a awm a, mi vanduaiten an vei a ni deuh ber. HIV erawh hi chu nu aṭanga nau paiah vanduai vanga kai awm ve bawk mah se, a tam ber hi chu nun inthlahdah leh fimkhur loh vang a ni. Mizoramah phei chuan sex aṭanga inkai chhawng an tam hle a, a pawi takzet a ni. 

Covid-19 a lo luh khan he hri hi chenpui thiam zir a ngaih tawh zawk thu leh, Covid-19 tibo tura hmalakna hi a hlawhtling tak tak thei dâwn lo, tih lam sawi a tam hle. He hri hi chu a la reh ve leh mai turah ngai ila, Mizoramah tun thlenga thihpui an la awm lo hi a lawmawm hle. Hetihlai hian HIV pawhin Covid-19 luh hmain min luhchilh tawh a, a chenpui kan zir pawh a ngai tel a, HIV positive-te kan en dan pawh kan thiam chhoh hret hret a pawimawh. 

HIV hi chu reh ve tawh mai lo tur, kan rama cheng ve reng tawh tur nia a lan avang hian kan kai ve lohna turin fimkhur chhuah ila, Mizoram mipuite HIV laka fihlim turin thapui thawhin i ṭang thar ang u.