Mizoram dinchhuah hun tur?

Youth 20 Mizoram, Ram leh Hnam hmangaihna, Ram Chhanna leh Hmasawnna atana intawhkhawm (Meet on Nationalism, Patriotism & Developmen) kharna Inkhawmah thusawitu Chief Minister chuan, tun hnaiah Mizoramin harsatna nasa tak a tawk a, heng harsatnate hian min chim buai mah se; Pathian kaihhruainain ropui takin Mizoram hi a la dingchhuak dâwn, a ti a; hnam thinlung nghet tak pu chunga ram tana thawk turin zirlaite a fuih.

Kan ram ṭhatzia te, kan ramah buh leh thlai a ṭhat duh thu te, sik leh sâ leh boruak nuam kan kan neih thu te, kan ramah hian hausakna awmin kan la din chhuah tur thute hi kan sawi nasa ta hle mai. He ram hi tunah chuan kutdawhin kan khawsa a ni ber a, sorkar laipuiah puk theih ang ang kan puk a, kan sum leh pai dinhmun a chhiat tehlul nen; eng tikah emaw kan la din chhuah tur thu lam hi sawi a tam ta hle.

Mizote hi kan ding chhuak thei a, kan la ding chhuak ngei pawhin a rinawm a, nimahsela chu chu a thlen theihna turin ruahmanna fel fai tak neih a ngai a, kalphung fel tak siam hmasak a ngai. Kan sum neih ang ang pawh enkawl fel hleithei lo chunga kan la din chhuah tur thu sawi reng te, ram ṭha tak kan neih thu inhrilh reng ringawt hi chuan intodelh lam hi chu min thlen dawn lo niin a lang.

Kan ram enkawl mektu lamin kan kal zel dan tura ruahmanna an neih kan hmu si lo a, ram an kaihhruai mek danah intodelh lam a hawi si lo a, tuna kan kal dan ngai hi chuan kan ding chhuak lo palh ang tih hlauhawm tak a ni.