Ramri venbuk kâng hi

Zawlnuam Vengpui Village Task Force-in Covid-19 kaih­hnawiha ramria vênbûk an siam chu a kâng a. Tripura-a Bru-te'n an hâl nia hriain an thinrim thu, Vengpui VLTF chuan an tarlang a, "Vengpui  VLTF ramri vênbûk, Tripura Tuikukte'n an hâl hi kan thin a rim tak zet a, ramri rawn kân rêng rêng dim an ni tawh lo ang, an chungah eng pawh thleng se an cho chhuaha ngaih tur a ni ang," an ti a; vênbûk hâl a nih chungchang chu thuneitu hnenah thlen a nih tur thu leh Mok kàia duty post hi sak ṭhat leh tur a nih thu sawiin, Zawlpui kawngah ngawrh lehzuala duty tur an indah dawn tih an sawi. 

Mizoram leh a chhunga chengte kan him theihna turin khaw hrang hrangin Mizoram ramri an veng a, patlingin hna ṭhulhin ramri ven hna an thawk ṭhin. Hetihlaia ramri venna tura sak bûk hal a ni hi a thinurthlak takzet a, a haltu hi state pawn lam mi an nih phei chuan a thinurthlak lehzual a ni. 

Ramri venbuk hi a nihna takah chuan Mizoram chhunga cheng zawng zawng tana pawimawh a ni a, he state chhunga cheng hnam hrang hrangte Covid-19 laka an him theihna tura sak a ni. Mizo mipuite ṭhahnemngai tak leh inlungrual taka kan thawhho laia state pawn lam mi Bru-te'n he ramri venbuk hi an lo hal tak tak a nih ngai chuan Mizoram leh Mizo mipuite lakah hian thupha an chawi ngei tur a ni.

Kan ram chhunga thil thleng ṭhenkhat social media-a lang kan chaiin kan sawi hut hut a, Mizo leh Mizo inkara buaina tenau deuhte khelin mipui nawlpuiin kan ngaihven ṭhin. Hetihlai hian kan ramri venhimna tura buk sak Tripura lama Bru-te ni ngeia ngaihin an hal thawm hian social media a luah mang der lo! 

Mizote'n mahni ram leh hnam kan ngaih pawimawh a, keimahni leh keimahni inkara thil thleng lian tham pawh ni lo aia ramri a thil duhawm lo thleng kan ngaihven zawk hi a pawimawh a, mipui nawlpui piah lamah sorkar pawh a chet chhuah a ṭul. 

Mizoram leh a chhunga chengte kan him tlan theihna tura ramri venbuk haltu hi khawi hmuna cheng pawh ni se, eng hnam pawh ni se man chhuah an nih ngei theihna turin sorkarin ke a pên a ngai a ni.