Airport leh bawk

Ministry of Development of North Eastern Region (DoNER) enkawltu Minister of State chuan Lengpui Airport tihchangtlunna hna thawh mek chu kumin October ral hmaa zawh a duh thu leh, chutiang tur chuan ṭan la turin Mizoram sorkara hotute a chah.

NESIDS sum hmanga airport tihchangtlun hna thawh mêk hi April 11, 2023 khan DONER Minister hian a tlawh tawh a, hemi ṭum hian October 2023 chhunga Airport chei ṭhat hna thawk zo turin Mizoram sorkar hotute a lo hrilh tawh a, tunah pawh a thu ngai tho a sawi nawn leh ta a ni.

Mizoramah hian a huna thawh zawh loh hna hi a tam ṭhin hle mai a, chhuanlam zawn dâwn chuan chhuanlam tur a tam thei ang. Chutihlaiin a thawktu lam nawr chak turin sorkar thuneitu lam hian ṭan an la tawk lo ṭhin a, a thawktute kutah kan innghat thui lutuk deuh ṭhin niin a lang.

Lengpui Airport chei hna hi NESIDS sum nuai 1,959 hmanga thawh a ni a, civil works 88% leh electrical works 68.31% thawh zawh tawh a ni a, October-ah chuan an zo hman dâwn lo niin a lang.

Kan Airport neih chhun chei hna kal meka sawi neuh neuh a awm reng mai hi a zahthlak a, a huna kan zawh theih loh chhan tak hi hriat a chakawm ngawt mai.