SERTHLUM ZUAR NUIMAWII

Karei!! Chu thlasik khaw vawt han vinzia leh van sanzia chu namai lo tak a hi. A lum thei ang berin ka inthuam a, ka chawlhna kawng sira khualb<k lun lo zet aṭang chuan ka kh<r chhuak hlau hlau a, car chhungah ka lut a. In lama nghakhlel taka min lo thlirtu ka nupui fanaute ngaihtuah chung leh mitthlaa hmu reng chungin vung takin ka tlan chhuak a. 

Kawi hnih emaw chauh ka tlan hman tih chuan pick-up truck hi ka va um phak a; kawng a zim avangin lehpelh mai theih a ni lo. Chu pick-up truck hnunga ka tlan pah chuan thil tam tak ka ngaihtuah a. Ka rilru a kal ding em em a, kawng zau lai deuh, lehpelh remchanna deuhah pawh chuan lehpelh nachang hre lovin ka zui ta zel a. Chu chu - nimin mai kha a ni.

Ka hmaa motor tlan mekah chuan nu upa lam, han en mai chuan pitar tih ve theih mai tawh tur, kum 65 mi awm vel hi a chuang a. Kawng chhe laia motor a han insawh deuh chuan a pawnchhe lukhum tla tur chu a vuan chat chat ṭhin a. A serthlum zawrh tur ni awm tak, a bula paikawng khat ṭana a dah chu a tluk hlauin a vawn a ngai bawk a. A intauh nat loh nan motor bang vawn a ngai bawk si a, a kut chu a indaih lo ngang mai.

Rei fe ka zui hnu chuan kawn z^l lai deuh hi kan thleng a. Chawhmeh leh theirah vel zawrhna tur ni awm tak, mau leh thingtuaia siam dawhkan chhe t> t> hi a lo awm thliah a. Pick-up chu a ding a, a hma seat, driver ṭhutna lo lam zawk aṭang chuan tlangval zuan zang awm tak pakhat hi a lo ṭum thla auh a. Pitar leh a serthlum dahna em chu a hlang thla a. An dinna piah lawkah chuan zunram thiar chhuanlamin ka ding ve nghal a, an khawsazia chu ka mitmei ru reng bawk a. Pitar chuan motor chuan man pek a tum ni ngei tur a ni; a pawnfen chhung lam ipte aṭang chuan pawisa a phawrh chat chat a. Tlangval chuan lu thin pahin motor-ah a luhsan a, an tlan leh nghal mai a. Khatih laia pitar nui hmel kha ka va hmu kher kher a aw! Mihring lawm lutuk nui hmel hi khatiang khawp khan a lainatawm thei a ni tih ka lo la hre ngai lo.

Pitar nui hmel ka hmuh tawh zawng zawnga ka rilru la khawih ber mai kha - Nimin mai kha a ni. Zunram te ka thiar zawh chuan pitar awmna lam chu ka pan phei ve ta a. Eng nge a chhan ka hriat miah lohvin ka thin phu chu a rang deuh tlat nia! A bul ka va thleng a, serthlum chu a lo chhep ṭha vel mek a. Chheh khat chu eng zat man nge ka han zawt a, aw th^m deuh chhalh hian, ‘Chheh khat hi pum 10 zel a nia, Rs 30 man a nih hi,’ a ti a. Chheh khat ka duh thu hrilh pahin pawisa ka pe nghal a. A kut cher ṭhik ṭhiak, thawhrimna avanga fip deuh fat lo lek chhuaka pawisa min kir pah chuan a nui leh a! Ka nghing deuh dawt mai hian ka hria.

Muangchangin ka inher a, eng emaw ti deuh taka thin tawt deuh ul chung chuan ka car dinna lam chu ka pan a. Muangchangin chu pitar serthlum zuar chu ka tlansan ta a. Kha pitar cher ṭhil ṭhel, pick-up driver ngaihsam takin a lungtum phurh tawp a, kawng chhe laiah pawh dim chuang hlek lova a phurh sawh ṭawk ṭawk pawha lawm avanga hlim taka la nui thei, serthlum pum 10 lek a hralh avanga hlim taka nui thei kha; tu tan emaw tak chuan khawvela ‘pi’ hlu chungchuang tak, tu pi mahin an tluk bik loh a ni ngei ang tih ka ngaigtuah a. A nui hmel chu ka mitthla-ah a cham tlat mai nia.

Tun hma kum 50 vel liam ta-ah te kha chuan tleirawl duhawm tak niin, an khuaa tleirawl nui mawi ber, tlangval tam takin cho ena an en loh khawpa z<n phur leh an khaw tlangvalte titi lailum luahtu ber pawh a lo ni ve tawh maithei. Tute emaw chuan khawvela an dam chhan awm chhun ni hial te pawhin an lo hre ve tawh ṭhin maithei a, nichin lawka ka hmuh, a kut cher tak leh fip fat mai te kha thlahlel ngawih ngawihin an lo hum ve vang vang tawh ṭhin ngei ang le!

Dinhmun a inthlak danglam ṭhinna leh, mihringte an danglam ṭhinna lei chungah hian ani pawh lo danglam ve-in, a duhthusam khawvel chu eng vang emaw takin a luah zo ta bik lo va, suangtuahnaa a lo din ve ṭhin ram nuam tak chu vanduaina eng emaw tak avanga thleng zo ta bik lovin, a khati ta a; amah avangin kei ka heti ta bawk a ni. Kha pitar kha han en mai chuan mawina leh duhawmna tlachham ve tak mai a ni a. A dinhmun chu tu tan mah awhawma sawi tur a ni lo. Mahse, tu tan emaw chuan nu zahawm leh pi chhuanawm ber a ni ang a. A serthlum hralhna pawisa nena a lo haw hun thlirin a tute chuan tukverhah ring an lo f^n an lo f^n emaw a ni awm si a. An tan chuan an pi chu a hlu-in a va chhuanawm dawn em! Mihringah hian tu hi hlua tu hi nge hlu lo bik chuang le? Tu hi nge hmuhsit tur ni a, tu hi nge diriam tur chu le? A hmangaihtu tana hlutna ropui danglam tak nei vek kan nihna hi mihringte vanneihna a ni a. Hmangaihtute tana tawp chin nei lova hlutna nei vek kan nihna hi inzahsak a va ṭul em!

Chutiang vel ringawt ka ngaihtuah lai chuan keimah zawk chu ka han inngaihtuah a. Pitar serthlum zuar kha ka han lainat viau ringawt a, keimah zawk hi mihring lainatawm tak ka lo ni zawk reng lo maw? Ka pi t> kha chu motor hnunga an phurh sawh ṭawk ṭawk pawhin lawm avangin a la nui thei a. Serthlum pum 10 lek a hralh avanga a lawm nui hmel chu hmuhnawm a tling a. Kei ve hi, niminah te, nizanah leh vawiinah te pawh, lawm lohna leh lungawi lohna ka va ngah bik si em!

Ka chan tawk chu kei aia sang leh chungnungte dinhmun nena khaikhinin ka lunghnur a, vanduai ka inti a, Siamtu lakah meuh pawh ka vui ru hial ṭhin a ni lom ni? Ka chan ṭhatna lam hlimpuia lawm taka nui mai tur ka nih lam reng reng ngaihtuah lovin, a theihna apiangah vuina ka zawng a, ka hmu ṭhin reng bawk a, duh aiin ka hmu tam mah mah ṭhin hial zawk a. Mahse, ka pi t> kha chuan a chan tawk apiangah lawmna a zawng thiam bik a, mi ṭhenkhat tana ṭahpui tham kha hlimin a nuihpui thei bik a. Ani lakah chuan kei hi mi khawngaihthlak tak chu ka lo ni zawk reng lo maw? 

Chutiang vel chuan ka ngaihtuahna a luah laklawh a, thil dang reng reng ka ngaihtuah thei lo. Ka lo lainat em em ka pi t> khan ka dinhmun dik tak chu hria sela min lainat let zawk ang em? Ṭhenawm khawveng leh mi ṭhenkhatin vannei min tih vena tam tak te hi ngaihtuah lovin, ka khawvel chu thim bik riauin ka lo hre ṭhin a, dinhmun chhe bik leh vanduai bikah inngaiin, ka hmuh phak chin khawvelah hian lawmna tur reng reng nei lovah te ka lo inngai ṭhin a ni lom ni? Chutiang rilru ka put chang apiang chuan ka pi nui hmel kha mitthla-ah ka hmu tawh ṭhin ang a, chu chuan chakna thar min pe ṭhin tawh dawn a ni tih ka hria. 

Khatia khaw vawt tak hnuaia thawmhnaw lum pawh inbel mumal lova serthlum ṭhutpuitu ka pi t> mawlh mai kha, milian leh mi hausa ṭhenkhat pawhin dinchilhin, rangkachak ṭhi leh rangkachak zungbun nena inchei vul ch<k chungin a serthlum te kha tlawm an la dil hram hram ang em tih te ka ngaihtuah kai zel a. Chutiang chu lo ni ta se, ka pi t> kha chuan hlim taka nuih let chungin a tlawm thei mai zelin ka ring. Chanchhe zawk anga lang leh tlawm zawk anga lang chung siin chutiang mite lakah chuan hnehna a puang a, chutiang mi duh^m leh chin tawk nei lova pamhamte lakah chuan hringnun awmze dik tak zirtir l>ttu a ni tih erawh a inhre phak bik kher lo maithei. 

Mahni thawh theih tawk leh thawh phak tawk pawh thawk peih lo mihringte hi ka mi ngaihnep ber an ni ṭhin a. Chu thu-ah chuan dik famkim emaw ka lo inti a, a bak ka lo ngaihtuah thleng ngai lo. Mahse, ka pi serthlum zuar nui mawi tak zarah khan, mahni thawh theih tawk thawh ngawt hi a lo la tawk lo va, mahni thawh theih tawk leh phak tawk ṭhahnemngai taka thawh a, chu thil chu hlimpui theih hi a lo hlutzia ka man thiam phah a. Mi hausa leh milian, lungawi lai a nei ngai lo a ni ange tih mai tur khawpa tum hmur reng mai te, sum leh pai tam tak khawl ṭun chunga lungngaia ṭap mek te, khawvel tehna aṭanga dinhmun sang taka ding, lawma an nui hmel hmuh tur awm ngai si lote ka hria a. Chutiang mite chuan ka pi lak aṭang khan zir tur tam tak an nei a, kei ngei pawh chu zir tur ngah ber zinga mi ka ni tih ka ngaihtuah chhuak a. 

Ka pi t> khan eng chen nge lehkha a zir a, eng chin nge a hriat ka hre lo. Mahse, vawi hnih chauh a nui hmel ka hmuh khan zirlai ropui tak min zir chhuahtir si. Kha zin kawng khawharthlak tak kha ka zawh leh tikah, ka pi t> khan serthlum a lo zuar leh a nih a, khatiang khawpa inngaitlawm hmel leh zahawm sia min lo nuih leh dawn a nih phawt chuan a serthlum ngei kha ka leisak leh ang.