A VUL NAWN NGAI SI LO

Zahngaihna nei hauh lovin thlasik khaw vawt vin em em mai chuan ang khat vekin mi tin a nuai a. Dai phul leh tuikhur kiang vela vur tla var tir tiar te chu zing ni chhuak sarah ah an tui ral a, mi vanneite tan ni a rei chuang lo va, ni rei ti em ema thlirtu mi vanduai leh chanhaite tan ni a tla hma chuang hek lo. 

Chu thlasik khaw vawt vin tak hnuaiah chuan mipa naupang kum 10 mi awm vel hian vawt tia khur bauh bauh chungin an in lam a pan a. A hma lawka kal a ṭhian dangte chu lum tak takin an inthuam hlawm a, ani erawh chuan kekawr lum a ha ve lo va, kawr lum chu ha ve bawk mah sela chutiang thlasik na lutuk hmachhawn nan chuan a kawrlum chu a lum tawk lo hle tih a hriat reng mai. A pheikhawk chu a sir ṭep hrip hrep tawh a ni a, a suihna hrui hmawr te chu a phuai fap bawk a. Chu mipa naupang mitmengah chuan lungngaihna emaw, hlim lohna emaw, chan tawka lungawi lohna emaw hmuh tur a awm bik chuang hauh lo - a dinhmun chu eng ang nge a nih a la chhut thiam miau lo va. 

An in, dai pawn titiha rap-in hlui tawh takah chuan muang changin a lut a, a pi, kum 60 mi awm vel chuan hlim takin a lo lawm a. An pitu chuan inngai tih hriat tak hian an han inkuah a, mipa naupang chu lungawi takin a nui a, a pi pawh chu a nui ve a, mahse, a nuihna mit aṭanga mittui tlem lo luang chhuak chu a tupa hmuh loh turin a thle sawn thuai a. 

Thankimi chu nula hmel ṭha taka sawi tur ni lem lo mah se nula chhe lo ve pangngai tak hi a ni a. Tlangval leh pathlawite fiam pawh a hlawhin a rim pawh a hlawh ve laih laih viau ṭhin. Nula ṭawng duh angreng tak, nelawm fu mai hi a ni a. A lo hmelchhe lem lo bawk nen, ngaizawngtu pawh a ngah ve laih laih viau a, an khua-ah chuan nula to pawl tak a ni. Miin an fakna leh tlangvalten an sep rawtuina ṭawngkam han hriat leh te chu nuam a tiin a hlim viau ṭhin a, nula luck nih chu a thupui ber a ni a, thil dang ngaihtuah a nei teh chiam lo.

Pawl 10 pass lovin zirna a chawlhsan a, a thiam zawng leh a phak ang tawk tawk thawka pawisa thawh chhuah ve tum lam ai chuan tlangval leh pathlawi hausa deuhte lawm zawng siam a, incheina leh a duh zawng dang lei nana hman chu a tuipui zawk a. Chutianga a khawsakna chuan mi pangngai hmuhah a hlutna a tla hniam zel a ni tih ngaihtuah phak lovin, thil leisaktu hmuh theih viau chu nula to nihna-ah a ngai nghet tulh tulh a, thawh chhuah nei si lova awm awl leh intih no chu a hna ber a ni chho ta.

A kawng zawh lam chu a rap na telh telh a, a duh loh leh ṭha a tih loh ṭhin anga khawsak a ngai zing tial tial a, a chak vang ni lovin zu in zeuh zeuh a ṭul tawh a. A peih vak loh ṭum pawhin zanah khawiah emaw chhuah loh theih lohna a ngah tial tial a, ama duh thu angin a nung thei ngawt tawh lo. Tleirawl duhawm tak ni ṭhin kha kum 25 a nih chuan vanglai a chen da ṭan der tawh a, a mawina te pawh a chuai ṭan a ni ta. Beiseitu erawh a la nei ve deuh reng a, mahse, amah rawn beiseitute chuan nupui atan ni lo, nawmsip bawl nan chauh an duh a ni tih pawh a hre chiang bertu a ni tawh a. Beiseitu a la ngah ang aiin ngaizawng tak taktu erawh a van ta pharh mai a. A phu tawk chu hniam tak an ni ta.

Kum 30 a han kai chho a, a hmel chu nasa takin a lo chuai tawh a. Pawisa a nei lo va, mamawh a ngah tulh tulh si. Chutiang dinhmuna a din tawh avang chuan pawisak a nei tlem tial tial a, pawi tih loh a ngah tial tial a, a nun tlabalin mihring a nghawng tur chu amah chauh emaw a ti ṭhin chu thil pawi ber zawka chu a ni.A nghawng a thuiin a na rei dawn nasa mai si a.

Duh thlang hlei thei a nih tawh miau loh avangin a tawn remchan apiang, zu leh thawmhnaw leisak theitu apiang chu a kawp an ngai tawh a, mi hmai eng zah thei pawh a ni tawh lo. Vanneihthlak nge vanduaithlak kan ti dawn ni, pathlawi pakhat luhkhung tur a hmu fuh hlauh mai a. Chu pa nena an han khawsa dun ta chu a duh zawng tam tak chu hnianghnar deuh zawkin a nei thei ve leh ta a. Fa hial a lo pai ve ta bawk nen, a nun chu a k^ng ve leh deuh ni hian a hriat a, fapa duhawm tak an han neih phei chuan an hlim nupa em em a. Mahse, nupaa ruih deuh reng mai chuan mihring hian lei rem rah a lo harsa a. Mahni inthunun thei hauh lo khawpa zu leh ruihhloin a bawih beh tawh mihring tan chuan dik leh fel taka khawvel hmachhawn hi a harsa lutuk a, khua a var thei tak tak lo.

Fa an neih aṭanga rei vak lovah Thankimi pasal chu thinlian natna vangin a boral hlauh mai a, an nufa chauha nun khawchhuah tum chu an tan a harsa em a, a nu leh pa an pan leh ta ringawt a. Nun kawng zawh dik lo laklawh tawh, insiamṭhat tuma thapui thawha ṭang peih tawh bawk si lo Thankimi te ang tan chuan hma lam hun hi a thim ngawih ngawih tawh a, a fapa chu a han en ṭhin a, a mittui a tla leh ringawt ṭhin. Nun chu a bul aṭanga han ṭan ṭhat leh a, chutianga duhawm chu fapa neih leh a, duat leh hlim taka enkawl a, a tan a hun zawng zawng pek a chak ṭhin a, mahse, tunah chuan a duhthusam chu mumang ang chauh a ni a, eng mah beisei tur a hre tawh lo.

Natna khirh takin a tlakbuak chho a, dam leh beiseiawm chi a ni tawh lo tih a inhriat chian avangin a fapa chu lainat leh rilru na takin a en ngawih ngawih ringawt mai ṭhin a. Nu leh pa nei lovin, a pi leh pu bulah harsa takin nun a rawn hmang chho dawn tih a han ngaihtuah a, a insum thei ngang ṭhin lo.

A nulat vanglai chho, a hmel mawi lai leh a vun mar nalh lai te, hna thawk tura a la chak ṭhat em em lai te khan amah chauh a lo inngaihtuah a, a kawng zawh tur atan pawh mi dang thu awih lovin ama nuam tih zawng ber a thlang a, engtikah emaw chuan fa te a la nei ve ang a, a fa chu hmangaih namen lovin a la hmangaih ang a, hrehawm leh rethei reng rengin khawvel hi a la rawn hmachhawn ang tih a hlauhpui em em dawn a ni tih reng reng a lo ngaihtuah phak ngai lo va. A inchhirin ban a chen a, phengphehlepa khua a tlai zo tawh a - hring nun hi a vul nawn ngai si lo.

Dem tur awm lovah dem tur a zawng a, ama thiam lohvah puhmawh tur dang a dap a, tihngaihna a awm tawh si lo. Ama duh ang anga a tal a, hma lam hun ngaihtuah reng reng lova nuam a lo chen lai khan, a fapa chu rethei taka nung turin a lo hlan daih tawh a ni tih a ngaihtuah phak si lo. A nawmchenna chuan nasa taka nghaisa letin, a tawpah rethei takin natna khumah a mu a. A bula a fapa ṭhu ngawi reng chu a han thlir leh zawk ṭhin a, thu ṭha hrilh a duh a, a fapa thu ṭha hrilh tur pawhin a insit ngawih ngawih tawh si. A fapa hmakhua ngaihtuah nachang a hriat chu a tlai lutuk tawh a, eng mah a tih theih tawh loh hnu-ah, natna hrehawm takin a sal beh tlat tawh hnu-ah a fapa hmakhua a ngaituah phak chauh a, lungngaiin a rum vawng vawng mai a ni. Lo ngaihtuah chiang deuh sela, hmangaih namen lova a la hmangaih tur a fapa tan chuan a nulat lai aṭang khan lo inpe daih tawh ni sela chuan chuti em emin a lungngai lo tur hi a nia!

Pitar chuan a mittui luang ngiai ngiai chu a han hru hul a. A tupa chu duat takin a kuah leh a. A fanu, a hmangaih em em, an thu awih lova nun kawng dik lo a zawh chhoh luih tlat avanga a hun hmaa boral ta Thankimi chu a mitthla-ah a lo lang a. Hmeichhe naupang fel tak a nih lai aṭanga natna tenawm tak vanga a hnuk a chah thleng khan hmangaihna tawp thei lovin a hmangaih reng a. Mahse, amah ber khan nun kawng a thlang sual miau a. Amahah tawp mai lovin, a fapa, mipa naupang fel leh duhawm tak nunkhua thlengin a nghawng chho a, a bul aṭanga siam ṭhat leh theih a ni tawh lo. A tupa lu chungah chuan a kut cher ṭhiak mai chu a nghat a, a nu kawng zawng dik loh vanga a chunga vanduaina thleng ve tawh lo va, van malsawmna tam tak a dawn theih nan a rilru-in a ṭawngṭai a.