THU LEH HLA ṬHA

Mihring nun sawi danglam thei hi thil tam tak a awm a, chung zinga langsar tak pakhat chu thu leh hla hi a ni. Mi mawl chuan thu leh hla ṭha lo a chhiatpui hlauh thei a, mi dawn tawi chuan thu leh hla ṭha a hmang ṭangkai thiam lo va. A dik zawnga ngaihtuahna hmang thiam mi chu thu leh hlain nasa taka chawi sangin, dinhmun sang takah a vawrh kang thei a. A dam chhung nite nuam leh hahdam takin a chhiar theih phah ṭhin. Zilhhauna leh fuihna mamawh lo mihring kan awm a rinawm loh a; mahni ngawta dam khawchhuah a, mite chhinchhiah tlak chanchin ropui tak neih hi thil harsa tak a nih rinawm. Thu leh hla hmanga zilhhauna leh fuihna dawng ngai lo mihring chu a taksa ṭhang puitling ve uak mah sela, a rilru lam chu a buchip viau thei. Chu vangin, mi tu pawh mai hian, hma lam pana tlan a, mite chunga chuanga nun chawi kang tur chuan thu leh hla ṭha kan mamawh em em vek a ni. 

Lehkha chhiar ngai lo chu a pianpui finna ṭha eltiang mah sela, chu chuan f^n tawp a nei a, famkim tawk lohna leh mawlna lai tak a nei ngei ngei ṭhin. Lehkhabu ṭha chhiar hnem na na na chu pianpui finna nei lem lo pawh a inzir fing chawp thei a, nasa takin hma a sawn thei a. A thlen phak ngai loh tura mi tam takin an ngaihah a chuang kai daih thei. Chu chuan mihring nuna thu leh hla ṭha pawimawhzia a tar lang chiang hle awm e. 'Thu leh hla ṭha' han tih hian thu ngaihnawm ngawr ngawr emaw, hla lunglenthlak hrim hrim emaw ngawt a kawk lo va. Mihring nuna awmze neia hna thawk thei, mi fuih phur thei, mi muthlu lai chhem harh thei a nih a pawimawh. Thu leh hla ṭha chu mi rethei tan chaw a ni a, mi lungngai tan hnemtu ṭha tak a ni a, mi beidawngte beiseina petu pawimawh tak a ni. Chutiang thu leh hla ṭha chuan khawvelah hian mi tam tak nun a lo her danglam tawh a. Phurna nei tawh lo kha phurna a pe a, huaisenna tlachhamte hnenah huaisenna mak tak a pe ṭhin. Chu chu amah maiin a hlawkna a tel tawh lo va, a ram leh hnam thlengin a hlawkna chu a lo tel ta ṭhin a ni.

Beidawnna te hian mihring nun hi a chawk buaiin a hnuk hniam thei em em a, a hnuk hniam mai pawh ni lovin, thlan khur thlengin a hnuk liam thei a ni. Chutiang mi beidawng, khawvelah hian nun ve rengna chhan tur nei tawh miah lova inngaite tan hlei hlei chuan thu leh ṭha hi a hlu a. Beidawnna ruam thim chhah tak aṭanga khai chhuaktu, khaw eng hmuhtir a, nasa taka an nun chawi sangtu a ni thei. Lehkhabu chi hrang hrangah hian, khawvel mi ropuiten an dam khaw chhuah theih nana an lo beih nasatzia te, hlawhtlinna chang thei tura suar leh ruam an pal tlang hnemzia te hi chhiar tam a ṭha khawp mai. Chu chuan kan hriat loh hlanin kan nunah awmze thuk tak a lo nei ṭhin.

Miin harsatna an pal tlang dan leh hrehawm an tawrh dan te hian kan hrehawm tawrh mekna lakah chhelna nasa tak min pe thei a. Mi tumruh takte chanchin hian tum chhin ngam tawh lova indawm kun mek kha a kai harh thei a. Chutiang lehkhabu ṭha tak tak chu kan kawtkai maiah lei tur tam tak a awm ve reng tawh. Nun chawm thei a nih avangin a leina lamah kan thilphal ve deuh te pawh a pawimawh khawp mai. Chaw dangral mai mai thlahlel a, thil ṭangkai lo leh tlo lo kan lei vak vak te ai chuan, nu leh pate pawh hian kan fate hi lehkhabu ṭha hlui nachang hria ila, mi ropui leh mi tumruhte chanchin te hi chhiar tam sela, chu chuan an nunah zawi zawiin awmzia a lo nei ang a, an nun a chawi sang em em ang tih hi a rinawm tlat a ni.

Mi ṭhenkhat chuan mi hlawhtling leh mi ropuite hi an hlawhtlin hnu chanchin chauh kan ngaihven a. An ropui hnu chanchin hi kan buaipui tawk viau ṭhin. Tuna a dinhmun anga ding tura hrehawm a tawrh nasatzia te, a tumruhzia te, a kawng zawh a awlsam lohzia leh malsawmna tla hlang chhar fuha lo ropui ta ngawt emaw, lo hmingthang ta ngawt emaw a nih lohzia te ngaihtuah miah lovin, a vanneihzia ringawt kan sawi chamchi ṭhin. Vanneihna tawng baw tura mihringin tih ve tur a ngahzia te, chhel a ngaihzia te hi naupang leh ṭhalaite hian chhiar tam sela, hring nun hi awlsam leh tluang taka zawh a, hlawhtlinna tlang chhipa chuan chhuah ngawt theih a nih lohzia te hi hre chiang sela, chu chuan an nun a kaihruai ang a, an zirna kawngah te, hma lam pana insang phek thei turin huaisenna a pe ang a. Nasa takin a nun a chawi kang ngei ngei dawn a ni. Mi hlawhtling kan tihte hlawhtlinna phena thil awm hi thu leh hla ṭha-ah chuan langsar takin a awm a. Chutiang chhiar tam chuan a nunah chhelna te, huaisenna te, tumruhna a seng lut a. Nun khaw chhuah dan tur dik a man a. Mi hlawhtling a lo ni mai ṭhin.

Thawnthu kan han tih ang chi-ah te pawh hian nun chawi sang thei tur, lehkhabu ṭha tak tak a tam mai. Naupang leh ṭhalai tan pawha ngaihnawm tho si, a phena thu awm ṭha em em, nun khalh ngil thei leh chawi sang thei tam tak a awm a. Chutiang chu kan fate hian an dap peih lo a nih pawhin, nu leh pa tal hian kan fate tan chhawp chhuahsak taimak a pawimawh khawp mai. Mi tumruh leh beidawng duh lote chanchin ngaihnawm tak hian naupang ṭhang mek leh ṭhalaite thinlungah nasa takin hna a thawk thei a. Mahni intihhlum duhna rilru hial lo pu tawh pawh kha beiseina thar pe-in, chona thar a hmachhawntir thei a. A nunram chau tak chu kai thovin, dinhmun sang takah a vawrh thei a ni. Thawnthu mai a ni lova, hla ṭha tak tak, mihring nun chawk phur a, thathona pe a, thinlunga huaisenna leh tumruhna tuh thei a tam mai. Chutiang hla ṭha chuan hmanlai aṭangin mi tam tak thinlungah a ṭha zawngin hna a lo thawk tawh a, vawiin thleng pawhin hla ṭha hian mi tam tak nun a chawm a, mi tam tak a khai ding a, nun thar a la pe reng a ni.

Chutih mek lai chuan hla hian inhuatna leh indona a chawk chhuak thei a. Mizorama indona hmingthang ber, chhim leh hmar indo pawh hlaa inphuah elna aṭanga boruak invaw lian a, indona hial lo chhuak ta a ni. Chu chuan hla-in mihring nuna hna a thawh nasat theihzia a entir chiang viau awm e. A ṭha lo zawnga hna a thawh chuan pawi nasa tak khawih thei thil a nih rualin, hla ṭha chuan hnam a chhanhim thei a. Hnam inṭhen darh tawh hnu a zawm khawm thei a. Nasa takin ram dinhmun a chawi kang thei a. Hmelma karah remna palai hna a thawk thei bawk. Hla ṭha hian mi tam tak mittui a lo hruk hulsak tawh a, thihna ruam ata mi tam tak a lo khai chhuak tawh a ni. Khup zawia ding chhuak hlei thei tawh lote tung dingin, mual eng hmu phakin a lo chawi kang tawh ṭhin. Chu a thiltih theihna ropui tak chu vawiinah pawh hian a la pangngai reng a ni. 

Mihring hian nunna atana chaw leh tui a mamawh ang maiin, hmasawnna atan thu leh hla ṭha a mamawh a. Thu leh hla ṭha tel lo chuan mihring nun a her sang thei lo va, hnam a ding chhuak tak tak thei lo va, ram a ropui tak tak thei hek lo. Thu leh hla ṭha hi nun khalh ngiltu mai ni lovin, mihring nun chawi sangtu pawimawh tak a ni. Chu vangin, nu leh pate pawhin kan fate hi lehkhabu chhiar tam tura kan infuih thar nasat a ngai hle. Tunlai khawvel changkannain a ken tel thil chi hrang hrangin kan fate a ei chhiat a, a tihṭawi a, hman tlak mang lohva a siam mek lai hian, a chhanchhuahna hmanraw pawimawh em em pakhat chu lehkhabu chhiar tam hi a ni tih hriat thar leh a; lehkhabu chhiar tam tura infuih sauh sauh a, lehkhabu ṭha kan dapsak pawh a pawimawh hle a ni. Nu leh pa tam tak chuan kan fate rual kan awhpui dan hi a dik lo fo ṭhin. Lirthei man to tak tak leh thawmhnaw man to tak tak leisak kan tim miah loh laiin, kan fate nun chawmtu tur kehkhabu ṭha chu cheng zahnih khat man lek pawh to kan ti a, pawisa kan ui leh tlat ṭhin. Harh a ngai a ni. Lehkha chhiar nasa hnam kan nih leh theih nan, nu leh pa, ṭhalai lungfingten ngaihtuahna thar seng a, bul kan ṭan ṭhat leh a ngai.