Zofate leh Hripui

Thantea chuan a motor khalh lai chu kawng kam hmun rem laiah chuan a tiding a, a bek leh a biang vela thlantui luang zawih zawih chu a hrûkpuan awrh lai chuan a han hru fai pawk pawk a. A chala thlan bawl ṭuk chu a hru fai leh pawk a, a han thaw halh a, hahdam awm tak hian a motor seat ngheng chuan a thaw ham ham a. A maimitchhing diar diar a, zankhuaa a tlan tawh avangin a mut a chhuak hle a. Chutia mutchhuakin a rawn man chiai chiai lai chuan a hma ni tlaia an in a chhuahsan dawn laia a fapain ban a rawn vai khum lauh lauh te, a nupuiin an naute pawm chunga kawngka aṭanga a rawn mangṭha lai te chu a mitthla-ah a lo lang a; theih chu ni se, hun harsa leh hripui leng vanga mipui manganga an vir buaina karah chuan an in lumah ngei a nupui fanaute chu kuah khawm a, thlamuan a, hlau thlabara an awm tur hnem ve a duh ngawih ngawih a, mahse, chutiang tithei dinhmunah chuan ding a inti si lo.

A truck lianpui hnungah chuan 'Highway is my home' tih a inziak kulh a, chu chu a motor nena an nihna dik tak a ni. Chutiang hun manganthlakah chuan inah tawmin, a nupui fanaute chauh ngaihtuah ta se, thingtlang hmun kilkhawr leh hmun hla tak takah, anni aia rethei leh harsa ve leh chhawngte chu chhuanchhamin an awm ang a, rilṭamin an mangang ang em em dawn tih a hai lo va, tlawmngaih chhuah hun a ni tih a hre chiang em em a, mahni in luma tawm thei a ni rih lo tih a hria. A hnampuite, a chipuite rilṭama an vakvai tur ngaingam lovin, a hrûkpuan hmanthiam a awrh a, zan tam mahnia khawhar taka hun hmang turin a thawk chhuak lo thei lo a ni.

A dinhmun leh a nihna mi ṭhenkhatin fiamthu thawh nana hmang a, 'Driver lu lian lungmawl mai mai' an tih ṭhin te chu a ngaihtuah chhuak a. Chutianga diriam a tawh chang chuan a rilru te pawh a lo na ve tawh ṭhin a, a hna chu a iai a, a zahpui a, rilru na takin a lo indawm kun ve tawh ṭhin. Mahse, a ramin hripui leng vangin harsatna a tawk a, mangang takin mipui an vir buai a, chaw nghei mai thei dinhmunah an ding a, chutih hunah chuan a lo zahpui ṭhin a hna chelh mek chu hna zahawm leh chhuanawm tak a ni tih a hre chhuak a. Hripui leng karah, khaw tam tak pal tlanga ram hla tak taka zin chhuah chu thih leh dam kar a nih avangin thil châkawm ni mawlh lo mah se, a ram tan a chet chhuah a ngai a, a chipuite mangang au rawlin a ko va, a thawk chhuak lo thei a ni lo tih a hria.

Mi ngaihsan leh mi zah ni ngai lo mah sela chu hun harsa leh manganthlakah hian mi manganna su kiangtu pawimawh tak a ni ve tih a ngaihtuah a, a lungawi a. Hna hniam tê anga ngaih thawk chunga a ram tana a tih chu ropui ve hle hian a hria a. Mi tana malsawmna a nih theihna tura ama tawrhna leh, a nupui fanaute khawharna te, an lunglenna te chu mena thlak a ṭulzia a hre thar zel a. Tumruhna leh huaisenna nen, a chipuite tana malsawmna ni turin a motor lian tak chu a tlawh kal leh ta ruai ruai a.

Hminga leh Rampuia chu luikama an bûk zarah chuan ngawi rengin an ṭhu a, mahni rilru kawmin an ngaihtuahna chu an awmna aṭanga hla takah, an chhungte bulah a awm a. Harsatna leh buaina karah, Mizoram mipuite hripuiin a nuai ve loh nan hridai theuin an rammu a, an mawhphurhna sanzia chu hrilh nawn an ngai lo. Hminga chuan chu hripui leng karah chuan a nu leh a farnu a tlansan a, ramri-ah, khaw lum hnuaiah, thosi karah phunnawi hauh lovin a hna chu rinawm takin a thawk a. A nu, kum upa lam tawh, chi-ai hma tak leh amah ngaihtuah em em ṭhintu chu a mitthla-ah a cham reng a. A rin dan chuan, a nu chu khum sirah ṭhingṭhiin a ṭawngṭai ang a, hmun hla tak, hmun ralṭi taka a fapa tan chuan mittui tla chungin a dil ang a, zan pawh a mu hlei thei lo ang.

Chutiang vel a ngaihtuah chuan a nu bula awm a, a nu chu hnem a, thlamuang taka a mut siai siai theih nana a kianga awm a duh ngawih ngawih a, mahse, police a ni a, ram leh a mipuite himna chu a mawhphurhna a nih miau avangin rinawm taka thawh a duh a; a hmangaih em em a nu leh a farnu pawh a kalsan lo thei si lo. A thawhpui dang tam tak pawh ani awmna aia hrehawm leh ralmuang lovah hridai theuin an buai ve hle ang tih a hria a, phunnawi a tum lo va, a zuau zawnga inngaihtuah pawh a duh hek lo.

Chutia hmun ralṭi leh khawharthlak taka an awm avanga an hnampuite hripui laka an him dawn phawt chuan chu aia lawmna an nei chuang lo va, an lungawi a, an duty an hlen kawngah chuan fak hlawh an phût lo va, rinawm takin chu lai ram rehah chuan ni leh zan an hmang ral a. Anmahni ber chuan hripui leng mek chu kaiin, hun khirh zawk leh manganthlak zawk an hmachhawn thei a ni tih hre reng chungin an mawhphurhna chu an hlen hram hram zel a ni.

Zamtea chu damdawi-inah Laboratory Technician a ni a. A hna chu hahthlakin lang lo mah sela hna hautak ve zet mai zawng a ni. Hripuiin khawvel a nuai mek laiin an dinhmun leh mawhphurhna pawimawhzia a hai lo va.

Damdawiina a thawhpui dang, doctor leh nurse te, health woker-te zawng zawng nen chuan râl hmatawnga sipai ang an ni tih a hria a, chawl hman an ni lo tih a hai lo. Mi chi hrang hrangin an chim buai a, chauh leh hah an sawi thei lo va, hmanraw nei ṭha tawk lo chung chungin mi chi tin chi tang an lo buaipui a. An dinhmun him lohzia te, duh anga ṭha hmanrua leh invenna an neih lohzia te hre reng chungin theihtawp an chhuah a, mipui damna leh himna chu an mawhphurhna a ni tih hre reng chungin taksa leh rilru chawl hman mang lovin an buai miah miah mai a ni.

Khawvelin a manganpui leh tihngaihna a hriat mang loh hripuiin min tihbuai laiin, thihna-in thla a zar a, khawvel ram ropuite pawh manganga an rum chuah chuah laiin kan ram hmun hrang hrangah, kawng hrang hrangin Zo nun ze mawi a lo par chhuak a. Hlawh nei reng reng lovin mi tam tak chu hripuiin min nuai loh nan tlawmngaiin an feh chhuak a. Mutbu tel meuha ramri lama riak chhuak tura mi tlawmngaite feh chhuak thawm te hi hriat a nuam a, a thlamuanthlak a, Mizo nih a nuam a, heng mi tlawmngai, hri do kawnga ram tana inpete zarah Zoramah inlungrualna te, inpawh leh zualna te, ṭanrualna te a par chhuak leh mek a ni tih hriat hian ngaih a ṭha a. Pi puten lu chhum ban chhum huama an lo sah zau, kan Zoram himna tura feh chhuak zawng zawngte hi Mizo mipuite tan an chhuanawm takzet a. Zahna chibai bûk tlak vek an ni. Mi tlawmngaite u, tunah hian Khuangchera iangin, hnam pasalṭha, thih hlau lo kah mi chauh kah ngamte kap tura kan rinpuite in ni a. In inpek thuk tak hi Zoram mipuiin kan hai lo va, zah takin chibai kan buk mek che u a ni tih lo hre mawlh teh u khai.