PATHIAN HI A LA AWM RENG E

March ni 16 kha ni tain ka hria, phone a rawn ri ral ral a. “Chhiahtlang Bial, Kristian Ṭhalai Pawl Secretary ka ni a, April ni 10 hian bial chhung ṭhalaite’n social media hman dan inzirtirna neih kan tum a, hun min rawn hmanpui thei ang em?” tiin sawmna ka dawng nawlh mai a. Keia kara min lo sawm ve duh chu, lawm takin aw ka lo pawh ve mai bawk a. Min sawm chhan ang takin, “Social media ṭangkai lai a lawm,” tiin lehkha rawn thawn buai ngai lovin WhatsApp lamah PDF-in sawmna chu rawn thawn mai turin thu kan inthlah a. Rawngbawlna dangah kan buai zui avangin kan inbe zui mai lova, March ni 21 a lo nih chuan kan hun hmanna tur hmunte zawtin, WhatsApp lamah kan inbe zui leh a. Sailam Veng Kohhran Sunday School Hall-ah an nghah thu min hrilh a, programme kim chang min rawn thawn zui vat a.

Kei hi pa ngaihsam tih takah engmah zawh zuina chang pawh ka hre lem lova, a hunte a la hla bawk a tiin kan han rial leh vang vang kha a ni a. Mahni hriat thiam dan danin Sailam tih chu Google Map lamah ka han en a, kan in aṭangin darkar 2 leh minute 35 vel tlan a ni tih min lo hrilh hre thuai a. Ngaih ṭha takin mahni tlatna mual mualah kan buai zui ve leh mai a. Kan KṬP hruaitu hlui pakhat leh Branch Committee ṭanglai pakhat chu chawpchilh deuh tak hian ka han sawm ve leh thawr a. Anni an lo remchang hlauh a, April ni 10, tlai dar 2:00 a chhuak turin thu kan titlu zui a. Mahni motor khalh pawha rui ṭhin ka nih avangin kal hma zanah damdawite inei lawkin, rilru thlamuang ang reng takin, hmanhmawh lutuk lova chhuah chu kan han tum ta kha a ni a.

Kan ṭhiante pahnih nen tlai 2:05 velah in kan chhuahsan thei hram a. Hmuifang tlangdung zawha Sailam peng kal tum ranin kan chhuak kha a ni a. Tlai 4:00 rik hma deuh hian Hmuifang Tourist Lodge kan thleng thei a. A hnai tawh tho tiin ei turte kan han chah khaw muang a. Chhiahtlang Bial Kristian Ṭhalai Pawl hruaitute pawh Hmuifang kan thlen tawh thu leh, thil kan ei lawk ang a dar 5:30 hmaa thlen hman kan tum thu kan hrilh zui zat a. Anni pawhin in rawn thlen har dawn loh chu tiin biak in lamah min lo chhawn an tum thute min hrilh a. Kan thil ei tur chah pawh siam chawp a nih avangin Minute 45 vel zet inhnawh puar nan hun kan hmang a. Programme hman zawha haw leh tum kan nih avangin puar takin kan ei a, kan tum ram lam panin kan chhuak leh ta.

Tlai 5:35 velah Sailam biak in awmna hmun kan thleng fel a, thleng hma hi kan han inti khawp mai a. Biak in kawtah chuan car pakhat ding tih loh chu tu mah reng an lo awm lova. KṬP hruaitute kan han bia a, “Biak inah lo chho rawh u, hei kan lo hmuak che u,” an ti, kan chhak deuhah chuan biak in dang a awm avangin kan kal sual a niang kan ti a, kan han sawi fiah ngial ṭhin a, a fuh hlei thei lo. Bial leader berin, “Video call-in inbiak a ngai,” a rawn ti a, kan awmna bulte chu tilang turin min han ti a. Video call aṭang chuan kan kalna hmun chu a dik lova, Sailam Kohhran chu Sailam khuaah ni lovin Chhiahtlang khaw chhungah a awm tih kan hrethiam ta chauh mai a! Kan awmna aṭang chuan Chhiahtlang chu kawng pangngai, Hmuifang lama let lehin darkar hnih vel tlan a lo la ni a. Feh kawngah kan tlan chuan darkar khat leh a chanve velah kan thleng thei dawn niin an sawi a. Kawng peng ṭhuam a tam avangin bo erawh a hlauhawm hle thung a, mang a ang duh hle mai. Pathian hnenah rilru ṭawngṭaina nena inhlan chungin feh kawnga kal chu kan thlang ta!

Khua a thim ṭan tawh a, kawng chu a têin a hnim hle mai a. Thui lo tê kan tlan hnuin kawng peng ṭhuam thlan tur a lo awm nghal a, a tir lamah chuan mi han zawh mai tur an lo awm hlauh a, kalna tur a hriat theih a. Thui deuh kan tlan leh hnuah kawng zawh tur pahnih a lo awm leh, phone signal a awm lo zui a, motor aṭangin signal awmna lai zawngin ram palailengah kan phone kan chawi sang a, vanneihthlak deuhin kan nau pakhat zawk chuan signal a nei hlauh mai, an hruaitute kan han be leh vat a. Khaw thim hnuaiah chuan kawng zawh zawk tur an sawi thiam tawh bik si lo, ṭawngṭai chungin, ka naute pahnih nen chuan kal tawp mai ṭhaa kan hriat avangin, rilru ngaihngam zan lo chungin, kawng ngil zawk chu kan han zawh risk ta tawp mai a. Kan kal sual a nih hlauh chuan ramhnuaiah zan khat chu kan riak dawn chu a ni phawt mai le! Khua han chuân theihna awm a awm bawk si lo nen, bei nge sei run dung ti chung zelin hma lam kan pan ve zel a ni ber.

Mat lui kân tur a awm thu a hmain min hrilh a, an sawi ni awm tak, lui luang lian vak lo chu kan kân thei ta hlauh mai. A hnu deuhah kawng ṭum pahnih, a chung leh hnuai lama kal theihna a lo awm leh a. KṬP hruaitute kan han be leh dawn a, anni pawh chu an mangangin an khaw pasalṭha leh ram chin hre deuh turte chu kawng chin zawtin an lo buai hle a lo ni a, kan be tlang thei ta reng reng lo va. Kan tlai dawn ruai a ni tawh bawk si, kawng chung zawk chu rinna nen, rilrua ṭawngṭai chungin kan han tlan risk ve leh ta tawp mai a. Kawng chu a zuih ral dawn emaw tih tur hi a ni a, a têin a chhe ang reng hle mai a. Ka rilruah chuan, “Lalpan rawngbawlna tur min pe a, min ti thlawn lovang,” tih hi chiang ang reng deuh hian a awm a. Beisei a bo hnuah tih ang deuhin in pakhat awmna kan thleng ta hlauh mai, kawng pawh a ziaawm ta deuh a. Naupang pahnih kan hmuhte chu Chhiahtlang kawng panna kan han zawt a, “Hla vak lovah Serchhip kawngpui in pawh ang a, vei lamah in kal ang a, Chhiahtlang chu in thleng thuai ang,” ti-a min han hrilh chuan, kan thaw huai a. Naupangten min hrilh ang ngei chuan kawngpui kan pawh ta thuai a, rei vak lovah, ka sanain dar 6:40 a kawh chiahah, Chhiahtlang, Sailam Veng, kan hun hmanna tur biak in ngei mai chu kan thleng ta a ni.

Kan ṭan hmain hla pakhat, “Ka tan Lalpa a ṭha a ni,” tih hi an lo sa rual ṭhup ṭhup mai a. Kan hun tawn leh kan thil pal tlang zawng zawngte khan, “Pathian hi a la awm reng e,” tih hi min rawn nem nghehsak ni mai hian ka hria. Programme zawh lama kan han sawiho chuan, kan kawng zawh kha mi hriat vak loh kawng ṭum hnai ber, mahse kawng a zim avanga pick-up-te chauhin an zawh ṭhin hi a lo ni reng a. Amah ringtute leh rinhlelh chang neite tan pawh Pathian hi a lo la awm reng a, a tlai ngai lova, min tithlawn ngai lo tih kan hriatfiah theihna turin feh kawng min zawhtir a. Kan kawng zawhte chu mihring ngaihah rual lo hle mahse, Lalpa ṭhatzia kan hriatfiah a, a thil tihtheihzia leh rinawmzia kan hmuhna tur a lo ni.

Synod Campus Ministry rawngbawlnaa kan tawnhriat, Tleirawl Inkhawm mai ni lo, Pathianni chawhnu inkhawm ṭhinte zingah pawh Pathian awm ringhlel an awm mekna khawvelah hian, kan rin Pathian hi a la pangngai reng a, kan ṭawngṭainate hi a hun ruat leh a duh dan angin min la chhang mek zel chu a nih hi. Kan duh dan leh kan beisei anga ṭawngṭai chhanna kan hmuh loh vang maia Pathian hi awm ta lo ang hiala sawi duhna thinlung lo piang ṭhin hian, kan biak Pathian thinlung hi a va ti lungngai ṭhin dawn em! Kan zin kawng thui lo tê khan Pathian awmzia leh biak pawh theih tura a la hnaih rengzia min hmuh fiahtir a. “Pathian hi a la awm reng e,” tih sawi thei tura ka la dam ṭek ṭek chhung chuan, ṭhang thar lo la awm turte hnenah, a thil tihtheihzia leh a thilmak tak tihziate hi ka la sawi zel fo dawn chu a ni phawt mai. PATHIAN HI A LA AWM RENG E.

- Lalnunsiama Khalthang